Рекорден број на странски доселеници во Германија

Бројот на пријавени странски доселеници во Германија и натаму расте. На крајот на 2017 година биле пребројани 10,6 милиони лица со странско државјанство во земјата, соопшти Сојузниот завод за статистика.
Со тоа, бројката пораснала за 585 илјади или 5,8 проценти во однос на претходната 2016 година. Растот е и далеку над просекот од претходните 10 години, кој изнесуваше по околу 388 илјади луѓе годишно, иако во 2016 година приливот на странци се зголеми за 13 проценти. Од 2009 година бројот на странски доселеници во Германија континуирано се зголемува. Основа причина е доселувањето од земјите на ЕУ- во прв ред од новите членки како Полска, Романија и Бугарија. Порастот на доселеници од овие земји во 2017 година е 439 илјади луѓе.
„Меѓу 2007 и 2017 странските граѓани со државјанство на една од новите земји-членки на ЕУ се зголеми од 919 илјади на 2,6 милиони“, соопшти службата. 

Повеќе на темата: 

- Македонците меѓу најбројните илегални работници на црно во Германија

- Македонците во голем број се селат во Германија

Од друга страна, приливот на странци од земји надвор од ЕУ се намалил. Од ткн. трети земји биле регистрирани 163 илјади нови жители, за разлика од 2016 година кога нивниот број изнесувал 665 илјади. Особено од Сирија, Ирак и Авганистан, во Германија доаѓаат далеку помалку луѓе.

Бројот на доселените македонските државјани, во меѓувреме, и натаму се зголемува. Според официјалната државна статистика, на крајот на 2017 година во Германија живееле 99.435 македонски државјани. Тоа е зголемување за речиси 4.000 луѓе во однос на 2016 година кога македонските државјани биле 95.570 на број. Во однос на последните седум години, од 2010 до 2017 година, се бележи драматично зголемување на доселени македонски државјани- од 65.998 во 2010 до 99.435 на крајот на минатата година.