Речиси никој не му верува на македонското правосудство

Правосудниот систем и политичките партии се на дното според довербата која граѓаните ја имаат во нив, покажува анкета спроведена од Евробарометар. Седум од десет испитаници во анкетата велат дека немаат доверба во правосудството, а над 60 проценти не им веруваат на политичките партии. Ни Собранието и јавната администрација немаат со што да се пофалат во тој однос.

Доколку работите се постават обратно, само 11 отсто испитаници му веруваат на правосудството, а нешто над 13 отсто на партиите.

Највисока е довербата во армијата и во претседателот на државата. На војската и веруваат нешто над половината од анкетираните граѓани, а на шефот на државата околу 45 проценти. Според степенот на доверба следуваат граѓанските организации, владата и полицијата.

Поддршката за НАТО и ЕУ останува стабилна, и таа се движи околу 65 проценти, и покрај разочарувањето од Самитот на ЕУ. Во тој поглед, само 25 отсто од анкетираните сметаат дека државата не добила датум поради внатрешните случувања во ЕУ, а дури 57 проценти сметаат дека за неуспехот била виновна владата. Од друга страна, речиси 65 отсто од граѓаните сметаат дека земјата е подготвена за почеток на преговорите, а речиси половината оценуваат дека „ЕУ има нефер и потценувачки однос“ кон нивната земја.

Во однос на дилемата дали ЕУ е најдобриот пат за земјата, резултатите покажуваат интересна поделеност по партиска линија. Имено, над 60 проценти од испитаниците кои гласаат за ВМРО-ДПМНЕ, рекле дека Северна Македонија треба да бара друга алтернатива надвор од ЕУ. Истото го мислат 22 проценти од гласачите на СДСМ.

Прашани да изберат која држава е најголем пријател на земјата, испитаниците во најголем процент се определиле за Германија, а по неа следуваат Србија, САД и Турција. Најголем процент од анкетираните, 37 проценти, најголема опасност за земјата гледаат во Грција, а по неа следуваат Албанија и Бугарија.