Русија подготвена за мировни преговори со Украина

Украинскиот претседател Володимир Зеленски на двапати му понуди мировни преговори на рускиот претседател Владимир Путин од почетокот на руската агресија врз неговата земја.

Во средата, кусо пред руската инвазија, Зеленски порача дека „безбедноста на Украина е поврзана со безбедноста на цела Европа.“
„Затоа денес мораме да разговараме за безбедноста на цела Европа. Тоа е нашата главна цел- мир во Украина и безбедност за нејзините граѓани. За овие прашања сме подготвени да разговараме со секого, вклучително и со вас. Во различни формати и на секое место“, порача Зеленски до Путин.

Од Киев стигаат најави дека владата е подготвена да вети дека земјата ќе има неутрален статус во однос на членството во НАТО за да запре насилството.

„Во одговор на барањето на Зеленски, Владимир Путин е подготвен да испрати делегација со претставници од министерството за обрана, за надворешни работи и администрацијата на претседателот во Минск на преговори со украинска делегација“, изјави портпаролот на Кремљ, Дмитри Песков.

Според Кремљ, белорускиот претседател Александер Лукашенко е подготвен да обезбеди услови за таква средба во Минск. 

Путин ја потврдил подготвеноста за преговори и во телефонски разговор со кинескиот претседател Ши Џинпинг. Путин му објаснил на Ши дека „воената операција во Украина била неопходна за да се заштитат луѓето од 'геноцид'“.