Русија има 150.000 војници на границата со Украина

Министрите за надворешни работи на ЕУ се одлучија за нови санкции против воената хунта во Мјанмар, но во однос на рускиот претседател Владимир Путин остануваат само на апели.

„Тоа е најголемото стационирање руски трупи (на границата со Украина, н.з.) воопшто“, изјави шефот на европската дипломатија Жозеп Борел по разговорите со своите колеги и наведе бројка од 150.000 војници. Не сакаше да го наведе изворот на оваа информација. Распоредувањето на војската, како што беше решено, продолжува. Во меѓувреме има и теренски болници и сѐ повеќе оружје.

„Ризикот од натамошна ескалација е очигледен“, додаде Борел. Но, и покрај желбите на украинскиот министер за надворешни работи, со кого ЕУ се советуваше, на крајот не беше донесена одлука за каква било акција. Дмитро Кулеба бараше натамошни санкции против Москва, но на крајот дома си замина само со комплименти на Европејците за „воздржаниот одговор на Украина“ на провокациите од страна на Русија.

И германскиот министер за надворешни работи Хајко Мас зборуваше за тоа дека треба да се избегне спирала на насилство преку ненамерни постапки и повика на „мерки за градење доверба и деескалација“. Земјите од т.н. Нормандски формат (Германија, Франција, Русија, Украина) ќе прават напори и натаму за конечно спроведување на договорот од Минск, рече Мас.

Со оглед на големото распоредување трупи во регионот не е јасно колку европско неединство се крие зад ваквите дипломатски флоскули. Мас нагласи дека „ЕУ во делот на санкции не каска зад никого“. Тоа е укажување на повеќегодишните санкции на ЕУ поради нелегалната анексија на Крим и во март воведените казнени мерки против четири лица од безбедносниот апарат на Русија поради нападот со новичок врз Навални.

Секому му е јасно, вели германскиот министер за надворешни работи, „дека работите (распоредувањето трупи, н.з.) за нас не се прифатливи и ќе има консеквенции“. Но, како тие консеквенции ќе изгледаат е прашање за кое се чини Брисел сѐ уште размислува. Во текот на викендот францускиот претседател во интервју за американската телевизија Си-Би-Ес беше појасен: дијалогот со Москва е важен, но сепак мора да се повлечат „јасни црвени линии“ за да му се стават граници на Кремљ. „Само така може да се биде веродостоен. Мислам дека само санкции не се доволни, но тие се дел од пакетот“, рече Емануел Макрон. 

Повеќе: 

Руски трупи на границата со Украина: Демонстрација на моќ или претстојна инвазија?

Украина бара помош од НАТО во конфликтот со Русија

Ослободете го Навални!

Борел, министрите за надворешни работи и претседателката на Европската комисија, апелираа уште еднаш до Москва да го ослободат од затвор критичарот на режимот Алексеј Навални со оглед на неговата лоша здравствена состојба. Борел рече дека добил писмо од тимот на Навални во кое стои дека неговата состојба се влошува.

Борел ја поздрави последната информација од Москва, според која Навални е префрлен во друга затворска болница, но рече дека тој мора да добие пристап до лекар кому му верува. „Русија е одговорна за безбедноста и здравјето на Навални, ние ќе ја сметаме за одговорна за тоа“, рече шефот на европската дипломатија. Но, и оваа закана е неодредена, најверојатно за да се застане зад САД. Владата во Вашингтон се закани со консеквенции доколку опозицискиот политичар почине во затвор.

Повеќе:

Меркел-Бајден: Руските трупи треба да се повлечат од границата

Нова Железна завеса помеѓу САД и Русија

Чешката дипломатска војна со Москва

Во меѓувреме во курс на колизија со Русија влегува Чешка. Чешката тајна служба им ја припишува на своите руски колеги експлозијата од 2014 година во магацин со оружје, во која имаше две жртви.

Двајца од учесниците во тој напад имале исти пасоши како осомничените во нападот со новичок во 2018 година во Солсбери против поранешниот руски агент Сергеј Скрипал. Сите индиции укажуваат на руската тајна служба ФСБ, се вели во Чешка. Магацинот кој експлодирал припаѓал на бугарски трговец со оружје, кој ја снабдувал Украина со оружје во нејзината борба против проруските сепаратисти во Донбас.

Владата во Прага е бесна поради тоа што актот на саботажа се случил на нејзина територија. Чешкиот парламент зборува за најтежок напад против суверенитетот на земјата од 1968 година досега. Министерот за надворешни работи Јан Хамачек ги информираше европските колеги детално за случајот. Аферата досега резултираше со меѓусебно протерување дипломати од Прага и Москва.

Во Брисел се слушнаа изјави на солидарност со Чешка. Случајот, како што се вели, е знак за будење за сите влади на земјите на ЕУ, кои треба да обрнат повеќе внимание на она што го работат руските дипломати и агенти. Чешка има намера да ја исклучи Русија од трката за нова нуклеарна централа во земјата, а Прага го откажа и купувањето на вакцината Спутник V. Чешката влада сега го зајакнува таборот на критичари на Москва во Европската унија.