Се бара прекин на огнот во Украина за Велигден

Генералниот секретар на ОН, Антониот Гутереш, денеска (19.04) упати остра осуда на руската офанзива на истокот на Украина и побара четиридневен прекин на огнот по повод православниот Велигден. „Наместо да биде празник на животот, овој Велигден се поклопува со руската офанзива во источна Украина“, рече Гутереш пред новинарите и побара „хуманитарна пауза“ од четврток до Велигден (24 април) со цел „да се овозможи отворање на низа хуманитарни коридори“.

Светскиот сојуз на цркви (или Екуменски совет на цркви, н.з.) го повика поглаварот на руската православна црква Кирил да се заложи за прекин на огнот во текот на православниот Велигден. Во писмо до рускиот патријарх, генералниот секретар на Светскиот сојуз на цркви, Јоан Саука, меѓу другото пишува: „Свесен сум дека не е во Ваша моќ и авторитет ставање крај на војната или влијаење врз оние кои имаат овластување за вакви одлуки, но верниците чекаат на утешен збор од Вашата светост. Тие мислат дека ако Вие, како духовен отец на толку милиони православни христијани во Русија и Украина, дадете јавна изјава и упатите молба, тоа би можело да има дејство.“

Саука му се обрати по писмен пат на рускиот патријарх уште на почетокот на март. Тогаш тој го замоли Кирил да се заложи за крај на војната. Во својот одговор рускиот патријарх повтори дека е цврсто убеден оти иницијатори на конфликтот „не се народите на Русија и Украина, кои потекнуваат од киевската крстилница и кои се обединети со заедничка вера, заеднички светци и молитви и имаат заедничка историска судбина“. За конфликтот, според него, е виновен Западот.

Русија ноќеска почна со воздушни напади на истокот на Украина. Рускиот министер за надворешни работи Сергеј Лавров во интервју за весникот „Индија Тудеј“ рече дека воениот ангажман во Украина влегол во „нова фаза“.