Локдаун за невакцинираните во Австрија

Поради големиот број заразени со Ковид-19, во Австрија денеска стапи на сила локдаун за невакцинираните, кршењето на ова правило ќе се казнува со 1450 евра, а владата разгледува и воведување на полициски час.

Бројките во Австрија растат, вчера беа евидентирани над 11.550 заразени, а седумдневната инциденца се искачи на речиси 850.

Лицата кои не се вакцинирани или оздравени во Австрија од денеска смеат да ги напуштат своите домови само во исклучителни случаи, како купување на намирници, посета на лекар или аптека или одење на работа.

Почитувањето на овие мерки стриктно ќе се проверуваат, а прекршоците ќе бидат казнувани до 1450 евра.

Повеќе: Коронавирус: Драстично поголема смртност кај невакцинираните

За почеток, мерките на изолација ќе бидат на сила во период од 10 дена, а ги усвоија покраинските и сојузната влада, но канцеларот Александер Шаленберг рече оти одделни покраини се слободни да поставуваат уште построги правила.

Главниот град Виена веќе најави дека ќе воведе дополнителни правила, ПЦР тест за вакцинираните и оздравените граѓани кои ќе излегуваат навечер во затворени простори и на сите случувања на кои ќе бидат присутни над 25 лица.

„Се надеваме дека ова ќе ја поттикне вакцинацијата. Со досегашните проширувања на мерките веќе е забележан скок на вакцинираните“, рече канцеларот.

Во Австрија во моментов се вакцинирани 65 отсто од населението. Австриската влада разгледува и воведување на полициски час навечер. Одлуката за ова, која би се однесувала за целата земја, ќе биде донесена во среда, изјави австрискиот министер за здравство, Волфганг Микштајн, вчера вечерта, а ограничувањето ќе се применува од 22 часот.