Влада: Ветото на Бугарија е неодговорна стратешка грешка
8 декември 2020
Со ветото за почеток на пристапните преговори на Северна Македонија со ЕУ, бугарската влада направи неодговорна и тешка стратешка грешка, соопшти владата во Скопје откако денеска мина и последната шанса да се отвори процесот за време на германското претседавање со Унијата.
Од Владата ја обвинуваат Бугарија дека го запрела „процесот на проширување како стратешка цел на ЕУ" и оценуваат дека тоа е „на штета на фундаменталните принципи и вредности на Европската Унија."
-повеќе на темата: Бугарија ги запре и Северна Македонија и проширувањето на ЕУ
„Северна Македонија никогаш нема да се откаже од правото на самоопределување на македонските граѓани кое е гарантирано со Повелбата на ООН, Универзалната декларација за човекови права, Европската конвенција за човекови права, Лисабонскиот договор како уставна основа на ЕУ и темелните вредности на Уставот на Република Северна Македонија.
-повеќе на темата: Шлагерот на нашиот неуспех
„Македонскиот национален идентитет не беше, не е и невозможно е да биде предмет на преговори. Македонскиот народ и македонскиот јазик се столбовите на македонскиот идентитет. Тие доаѓаат од минатото, а во исто време се столбови на нашата европска иднина.“, велат од Владата.
Во владиното соопштение се ветува засилување на внатрешните реформи и придвижување кон ЕУ преку „изградба на европски стандарди дома“, како концепт без алтернатива.