Има согласност за процесот на помирување
30 ноември 2018
Ние изразивме политичка волја, а сега да им оставиме на правните тимови да ги направат следните чекори, изјави денеска по средбата со Координативното тело за помирување и интеграција во Собранието, премиерот Зоран Заев. Според него, мора да се направи „дистинкција“ помеѓу „насилство и и учество“ во настаните од 27 април 2017 година во Собранието.
Заев нагласи дека би требало да се разграничи што е насилство, а што не е насилство, како и што е физичко насилство, а што реализација и осмислување и што значи учество во толпа и заведеност или понесеност за такво учество. Тој тврди дека постои волја и желба за помирување, но потенцира дека црвените линии не смеат да се поминуваат за „да не ни падне напамет да влијаеме врз правосудниот систем“.
Повеќе: Помирувањето бара и дијалог меѓу Заев и Мицкоски
Потпретседателката на Собранието, Фросина Ташевска Ременски, која е копретседателка на Координативното тело за помирување и интеграција, потенцираше дека разговорите се водат во духот на „стратешките цели на Република Македонија, а тоа е заокружување на процесот на уставни измени, добивање на членство во НАТО и секако процесот на започнување разговори со ЕУ, што искрено очекуваме да почнат во јуни следната година“.
Повеќе: Македонско помирување
Според Ременски, сите овие процеси се комплеметарни. Оценувајќи дека јавноста и медиумите се фокусирани на Законот за амнестија, Ременски додаде дека „работните групи и тела имаат мандат, бидејќи го имаат веќе и составот, ги имаат и претставниците од Владата што ќе учествуваат во работата на ова тело, дека ги имаат сите механизми што им се дадени согласно со одлуката, да вклучуваат и други пратеници, правни експерти, да ги вклучат МАНУ, цивилно општество, медиуми, коишто ќе можат да сугерираат и даваат решенија за овој комплексен процес“.
Емилија Александрова, копретседавач на Координативното тело од независната пратеничка група на ВМРО-ДПМНЕ, оцени дека на денешната средба се водела конструктивна дебата и дека се формирани три подгрупи за интеграција, реформи и помирување, кои до вторник треба да ги разгледаат своите области и да излезат со конкретни предлози и решенија, со што би се дало динамика на процесот.