Речиси половина жители на Ишгл инфицирани со коронавирус

Опсежна студија, како што соопшти Медицинскиот универзитет Инсбрук, при испитувањето на граѓаните кај 42,4 % утврдила присуство на антитела за коронавирус. Ова е досега највисока вредност регистрирана во светот, изјави директорката на Институтот за вирологија, Дороте фон Лер денеска во Инсбрук. Антителата во крвта се сметаат како доказ за прележана инфекција.

Ишгл со своите барови- собиралишта на туристи-скијачи, се сметаше за жариште од кое коронавирусот се рашири низ Австрија и во делови од Европа. Податоците на австриските власти велат дека во извесен период дури 40 проценти од сите случаи во земјата потекнувале од кластерот Ишгл. И многумина Германци веруваат дека се заразиле токму во ова австриско скијалиште. Специјална истражна комисија во сојузната австриска држава Тирол го испитува во меѓувреме критикуваниот кризен менаџмент.

Повеќе:

Коронавирус: Колку се корисни тестовите за антитела?

Шведскиот експеримент со Ковид-19 на стаклени нозе

Што треба да знаете за тестовите за коронавирус

„Див запад“ на пазарот на тестови за коронавирус

Интересно е што од тестираните лица, само 15 проценти имаат добиено дијагноза дека се болни од Ковид-19, истакнува Дороте фон Лер. „85 проценти од оние кои се инфицирале, поминале без да почувствуваат некакви симптоми". Без оглед на високиот процент на жители кај кои се присутни антитела за коронавирус, ни Ишгл нема достигнато т.н. имунитет на стадото, односно општ имунитет на популцијата. Решавачки за опаѓање на бројот на случаи биле карантинот и запазувањето социјална дистанца. Во студијата биле опфатени околу 80 проценти од жителите на Ишгл. 1427 учесници биле испитувани во периодот меѓу 21 и 27 април.