Твитер го тужи Илон Маск

Онлајн платформата Твитер го обвинува Илон Маск за прекршување на договорот и затоа поднесе тужба. Според Твитер, образложението на Маск за повлекување од договорот за купување, тежок милијарди долари, е „лицемерие“.

Маск се откажа од купување на Твитер по цена од 44 милијарди долари поради наводни „лажни и залажувачки“ наводи на онлајн платформата. Маск го обвинува Твитер особено за погрешни податоци околу бројот на спем и лажни профили на платформата. Има значително повеќе лажни профили од она што Твитер постојано го наведува, имено помалку од 5%, објасни Маск. Неговите адвокати тврдат дека Твитер не ја исполнил својата обврска од договорот да му достави на Маск пристап до податоците за проверка на бројките.

Твитер, пак, ги отфрла обвинувањата и смета дека повлекувањето на Маск е незаконско. „Однесувањето на Маск само потврдува дека тој сака да се повлече од обврзувачкиот договор, кој го потпиша по слободна волја, и дека притоа сака да му наштети на Твитер“, се вели во тужбата. Маск мисли дека може да си дозволи едноставно така да се повлече од договорот, да ѝ нанесе штета на компанијата, да ѝ го расипе бизнисот и да ги уништи вредностите на акционерите, оценија адвокатите на Твитер.

- повеќе: Дали Твитер под Маск ќе стане агенција за лажни вести?

Судот сега ќе мора да донесе одлука дали Маск смее да се повлече од договорот или не. Мултимилијардерот и Твитер во договорот имаат внесено одредба која предвидува казна во висина до милијарда долари доколку една од страните се повлече.