Доналд Трамп има нова работа
9 септември 2021
Поранешниот американски претседател Доналд Трамп има нова работа - ќе го коментира бокс-мечот помеѓу поранешниот светски првак во тешка категорија Евандер Холифилд и бразилскиот ММА-борец (ММА - мешани боречки спортови), Витор Белфорт. Притоа, заедно со Трамп Сениор ќе коментира и неговиот син Доналд Трамп Јуниор.
„Сакам извонредни борци и големи борби“, оценува Трамп и додава дека се радува што „во сабота навечер ќе ги гледам двајцата и ќе можам да ги споделам своите размислувања“. „Не би сакале да го пропуштите овој посебен настан“, порачува Трамп, а неговите зборови се пренесени во соопштение лиферувано од страна на стриминг-сервисот Fite TV.
Скапо задоволство
Мечот ќе се одржи во „Хард Рок Хотел и Казино Холивуд“ во Флорида. Оние кои сакаат да го гледаат мечот преку Fite TV ќе мора да платат по 49,99 долари. Тие ќе може да оценат и колкаво стручно познавање од бокс има републиканецот Доналд Трамп.
Тој во секој случај веќе има искуство со боксот. Додека поседуваше казина во Атлантик Сити, таму се одржуваа многу бокс-мечеви.
58-годишниот Холифилд својата последна борба ја имаше пред многу години. Против Белфорт всушност требаше да се бори бокс-легендата Оскар Де Ла Хоја, кој се надеваше на камбек. Но, 48-годишникот отпадна поради Ковид-заболување