Трамп го отпушти шефот на ФБИ, Коми

Одлуката на Доналд Трамп дојде како гром од ведро небо. Директорот на Федералното истражно биро (ФБИ), Џејмс Коми е разрешен од функцијата под итна постапка, соопшти Белата Куќа. ФБИ во моментов е задолжен за истрагата за можните врски меѓу тимот на Трамп и Русија за време на кампањата за претседателските избори во САД. Веќе поради тоа директорот на ФБИ важеше речиси за недопирлив. Истрагите против тимот на Трамп со месеци наназад фрлаат сенка врз претседателствувањето на републиканецот.

Во писмо упатено на Коми, кое го пренесоа американските медиуми, Трамп истакнува: „Примив писма од генералниот сојузен обвинител и неговиот заменик во кои се препорачува Ваше разрешување од функцијата директор на ФБИ. Јас ја прифатив оваа препорака. Со тоа завршува Вашата должност како директор на ФБИ и одлуката стапува во сила веднаш“

Коми не може ефикасно да раководи со ФБИ?

Претседателот на САД натаму во писмото вели: „Знам да го ценам тоа дека во три посебни наврати ме информиравте дека не се води истрага против мене, но сепак се согласувам со проценката на Министерството за правда дека не сте во состојба ефикасно да раководите со ФБИ“. Трамп на крајот од писмото додава дека сега е  од „есенцијално значење“ да биде повратена довербата во ФБИ.

Џејмс Коми како директор на ФБИ во последниов период беше задолжен за истрагата за евентуалното вмешување на Русија во изборниот процес во САД  и за хакерскиот напад врз изборниот штаб на претседателската кандидатка од редовите на Демократите, Хилари Клинтон, за време на кампањата за претседателските избори.

Среде предизборната кампања Коми спроведе истрага и за приватниот сервер кој Хилари Клинтон го користела додека била на чело на американскиот Стејт департмент.

56-годишниот Коми пред четири години беше поставен на чело на Федералното истражно биро од страна на тогашниот претседател на САД, Барак Обама. Регуларниот мандат на директорот на ФБИ  е преку десет години.