Турската армија зазеде позиции во Идлиб

Според извештај на весникот „Хуриет“, турски воен конвој со околу 30 оклопни возила синоќа ја преминал границата кон Идлиб, а во негов состав биле вклучени и специјални воени единици. Бројот турски војници во Идлиб следните денови дополнително ќе се зголемува. Турската државна новинска агенција Анадолу известува за стационирање бројни оклопни транспортери, болнички возила и контејнери на границата кон Сирија.

Од вчера во пограничната провинција се воспоставени „извидувачки пунктови“, а целта на Турција е создавање „зона на деескалација“ и постигнување примирје меѓу бунтовниците и владините трупи, соопшти армијата во Анкара. „Зоните на деескалација“ во, од граѓанска војна потресуваната, Сирија, се во согласност со спогодбата која беше постигната меѓу Турција, Русија и Иран.

Турција критикувана поради долготрајна толеранција на џихадистите

Во понеделникот Турција најави почеток на воена офанзива во северносириската провинција Идлиб. За да изнуди прекин на огнот и да спроведе „зона на деескалација“, Турција мора да ја истера оттаму џихадистичката група Хајат Тахрир ал-Шам, која се иззеде од договорот за примирје. 

Идлиб е последното упориште на исламистичките борци од Хајат Тахрир ал-Шам во северна Сирија, кои во август под своја контрола ставија големи области од провинцијата. Во групата доминира поранешниот огранок на Ал-Каеда, порано познат како Ал-Нусра фронт. Хајат Тахрир ал-Шам официјално денес нема никаква врска со терористичката организација. Сепак, САД, кои и натаму ја класифицираат за терористичка група, во август ја обвинија Турција за предолго толерирање на Ал-Каида во Идлиб.

Контроверзи во овој поглед предизвикуваат и извештаите на Слободната сириска армија во врска со турскиот воен конвој. Според претставник на Сириската слободна армија, турскиот воен конвој бил ескортиран од борци на групата Хајат Тахрир ал-Шам. Тоа наведува на заклучок дека Анкара не презема воени акции против екстремистите од  Хајат Тахрир ал-Шам, чие влијание во Идлиб во последно време е значително засилено.

Формирањето „зони на деескалција“ е резултат на сириските мировни преговори меѓу Турција, Русија и Иран кои беа водени во Астана. Досега се создадени три вакви зони. Но, набљудувачите во турската акција гледаат и намера од евентуален ангажман на Анкара против курдските милиции во соседниот регион Африн. Турција сака на секој начин да спречи создавање хомогена територија на Курдите во регионот и да им застанена патот на курдските планови за независна држава.