Турски војници бараат азил во Германија

Кратко пред патувањето на германската канцеларка Ангела Меркел во Турција, медиумите известуваат дека околу 40 турски воени лица, стационирани во бази на НАТО, побарале азил во Германија. Според информациите на „Шпигел“ и емисијата на првиот јавен сервис АРД, „Рапорт од Мајнц“, станува збор во најголем дел за високи по ранг офицери. Германската сојузна служба за миграција и бегалци, како и Сојузното министерство за внатрешни работи велат дека случаите ќе имаат третман еднаков на сите апликации за азил. Моментот на објавување на информацијата е прилично деликатен, зашто канцеларката Меркел в четврток патува на политички разговори во Турција, еден ден пред ЕУ-самитот на Малта.

„Нема двојба, не можеме да ги вратиме овие војници во Турција, таму директно ќе завршат во затвор“, изјави политичарот на ЦСУ, партија-коалиционен партнер во владата, за магазинот „Шпигел“.

Претседателот на Комисијата на Бундестагот за надворешни работи, Норберт Ретген истакнува: „Постапката за азил е чисто правна пработа, во која политичките очекувања не смеат и нема да играат никаква улога“.

Грчкиот министер за одбрана Панос Каменос поаѓа од претпоставка дека бројот турски офицери кои побарале азил во Европа, е уште поголем. „Барање за азил имаат доставено преку 400 турски воени лица“, изјави тој за грчката телевизија Скај денеска. Тој се повикува на информации од кругови на НАТО во Брисел.

Турската влада веќе ѝ се закани на соседната Грција со консеквенции откако Врховниот суд на Грција во четвртокот отфрли екстрадиција на осуммина турски офицери. Тие во јули 2016. година, по неуспешниот обид за пуч во Турција, со хеликоптер пребегаа во Грција и таму поднесоа апликации за азил.

Анкара ги смета офицерите за пучисти и не ја прифаќа судската одлука. Турскиот министер за надворешни работи Мевлут Чавушоглу се закани со откажување од бегалскиот договор со ЕУ и од билатералниот договор за реадмисија со Грција поради спорот околу офицерите.

Двајца од нив за АРД и „Шпигел“ тврдат дека немаат никаква врска со обидот за пуч, но без оглед на тоа во Турицја им се заканува одење во затвор и можеби мачења. Офицерите го обвинуваат турскиот претседател Реџеп Таип Ердоган за систематско истиснување на прозападните и секуларни ставови меѓу Турците во војската. Турската влада за обидот за пуч го обвинува проповедникот Фетула Ѓулен и неговите приврзеници. Од летоска наваму во Турција под тоа обвинение се уапсени илјадници луѓе, меѓу кои и илјадници војници.