Украина ќе победи, тоа е сигурно

Не знам што ќе се случи утре или дури вечерва. Звукот на сирените кои предупредуваат за воздушни напади? Плачот на новороденчињата во засолништата за бомби? Ужасните информации за смртта на деца и жени во градовите и селата кои руската војска брутално ги брише од лицето на земјата? Ладнокрвни убијци ни упаднаа дома. Секој од нас може да стане нивна жртва. Но, затоа не треба да ги одложуваме разговорите за блиската иднина на мојата земја, која Русија се обидува да ја потопи во крв. 

Путин ги лиши Украинците од избор 

Кошмарот што започна во Украина на 24 февруари го претвори изминатиот месец во еден бескраен страшен ден. Целиот свет беше згрозен од злосторствата, суровоста и цинизмот на окупаторите, кои уништија градинки, училишта, родилишта, клиники и домови во десетици градови и стотици села.

Путин ги лиши Украинците од избор. Јасно е: или тие на нас, или ние на нив. Затоа милиони Украинци се кренаа да ја бранат својата земја. Не е јасно на што се надева Путин. Никој никогаш, под никакви околности, нема да му дозволи да ја претвори Украина во држава под руска контрола. Убиените 15.000 руски окупатори се само авансот што Москва веќе го плати за воената авантура на Путин. За еден месец, армијата на Руската Федерација претрпе такви загуби како Советскиот Сојуз за време на десетгодишната војна во Авганистан. 

Трансформацијата на Украина во голема герилска група става крај на обидите на Путин да ги покори Украинците со сила. Ова нема да се случи во април, мај или декември - никогаш. Никој никогаш нема да им ги прости на Русите пукотниците во Мариупол, Харков, Чернигов, Гостомел, Ирпин, Буча и стотици други градови и села. Првиот шок им отстапи место на омразата и гневот на Украинците. Оние кои пристигнаа во Украина со тенкови со злобното Z ги чека неизбежна смрт во блиска иднина, а нивниот врховен командант - барем уште еден „Авганистан“ по бројот на загинати војници. Загина „рускиот свет“ на украинска територија. Владимир Путин сам го ликвидира за само 30 дена.

Мировните преговори што Киев и Москва ги започнаа, се осудени на неуспех. Путин очекува капитулација од Зеленски. Но, нема да ја дочека. Крим бара денацификација и демилитаризација, а уште повеќе - принудно Киев да го признае т.н. ЛНР и ДНР за независни, а Крим - за руски, се доказ дека во блиска иднина меѓу двете земји нема да бидат склучени никакви мировни договори.

Да, преговорите се во тек. Да, земјите зборуваат за некаков напредок. Но, секој мир од Русија ќе значи војна за Украина. Спроведувањето на планот предложен од Москва неизбежно ќе доведе до остар конфликт во земјата. Ставот на Зеленски е исклучително јасен: само народот на сеукраински референдум има право да одлучува за прашањето за членството на Украина во НАТО, иднината на Донбас и Крим. Иако ставот на Украинците за предлозите на Путин е јасен и без референдум. 

Кога ќе заврши војната во Украина? 

Ова е веројатно најчесто поставуваното прашање на Украинците. Но, досега никој не можеше да одговори, вклучително и самиот Путин, кој го започна овој бесмислен и крвав масакр во Украина. Јасно е дека патот на Украина до победата нема да биде лесен. Како и фактот дека војната оневозможува враќање на статус кво од 24 февруари 2022 година. Украина и оние што ја бранат со оружје бараат не само мир, туку и протерување на Русија од сите нејзини окупирани територии од 2014 година. 

Војната може да заврши исто толку неочекувано како што започна. Причините може да бидат различни: активна помош од Западот, физичка ликвидација на Путин од неговото опкружување, импичмент, успеси на украинските вооружени сили... Но, во секој случај, ќе победиме. Тоа е сигурно. И знам дека оттогаш ќе имаме многу работа за да ја обновиме земјата. Не смееме само да ги враќаме нашите деца од скривниците во градинките и училиштата. Наскоро ќе создадеме силна држава во која пијаниот сосед-насилник кој мафта со автомат, веќе нема да се осмели да влезе.

***

Сергеј Руденко е украински новинар и политички набљудувач. Има објавено неколку книги за украинската политика. Тој е повремен колумнист на Дојче веле.