Австрија воведе задолжителна ковид-вакцинација

Во борбата против пандемијата на коронавирус, Австрија е прва земја од ЕУ која воведува општа задолжителна вакцинација. Големо мнозинство на пратениците во парламентот во Виена синоќа дадоа согласност за предлог законот по жестоката дебата. Обврската за имунизацијана сите граѓани над 18 години важи од почетокот на февруари, во спротивен случај од средината на март се закануваат парични казни до 3600 евра. Исклучок се прави за бремени жени, луѓе кои од медицински причини не смеат да примат вакцина и излечени во период до шест месеци по инфекцијата. Мерката не е насочена во прв ред против варијантата Омикрон, туку за спречување евентуелани идни корона-бранови и вирусни варијанти и за растоварување на болниците.

Покрај пратениците од владејачката коалиција од конзервативната Народна партија и Зелените, за законот за задолжителна имунизација против Ковид-19 гласаа и голем дел од пратениците на опозицијата – Социјалдемократите и либералниот Неос, само деснопопулистичката Слободарска партија гласаше целосно против.

Моментно во Австрија важечки вакцинален сертификат имаат 6,4 милиони луѓе, односно 71,8 % од населението. Владата сака да ги мотивира граѓаните на вакцинирање и со воведување посебна лотарија – оние кои се вакцинирани или допрва ќе се вакцинираат, можат да освојат ваучер во вредност од 500 евра.