Црн рекорд во Германија: Речиси 30.000 инфицирани за 24 часа

Нов рекорд на новоинфицирани и починати во последните 24 часа во Германија. Институтот „Роберт Кох“ соопшти дека бројот на новоинфицирани е 29.875, а бројот на починати за еден ден - 598. Бројот на инфицирани од коронавирус досега е 1.272.078 лица, а бројот на починати се искачи на речиси 20.970.

Црниот рекорд уште повеќе ги засили барањата за драстични рестриктивни мерки во земјата веќе пред Божик. „Јасно е дека мора да затвори и трговијата на мало. Мора максимално да ги ограничиме контактите“, изјави изутринава премиерката на покраината на Мекленбург Предна Померанија, Мануела Швезиг.

Експертот на СПД за здравствени прашања, Карл Лаутербах, за весникот „Рајнишен пост“ рече дека она што е потребно „наредната недела е најрестриктивен можен 'локдаун' на ниво на државата, вклучително и затворање на училиштата“.

Повеќе:

Коронавирус: Зошто се најтешко погодени регионите кои гласаат за екстремната десница?

Последната битка на Ангела Меркел

Коронавирус: Меркел бара построги мерки во Германија

Сојузот и покраините досега не можат да се договорат за заеднички мерки. Нејасно е и кога ќе се сретнат канцеларката Меркел и покраинските премиери. Главно нема противници на предлогот за заострување на рестрикциите помеѓу Божик и 10 јануари. Сепак, шефот на Сојузната лекарска комора, Клаус Рајнхарт предупреди дека не треба да се имаат преголеми очекувања. „Илузија е да се верува дека со цврст локдаун во траење од 14 дена по Божик ќе ја ставиме под контрола пандемијата“, оцени тој за РНД.