Armëpushim i përkohshëm në Lindjen e Mesme

Ushtria izraelite ka rënë dakord për një armëpushim të kufizuar këtë të enjte me iniciativën e Kombeve të Bashkuara. I dërguari i OKB-së për Lindjen e mesme, Robert Serry kishte propozuar armëpushimin, me qëllim që popullsia në Gaza të furnizohet me ushqime dhe mallra të tjerë ndihme. Bombardimet ndalën në paraditen e së enjtes dhe zgjasin pesë orë, ka bërë të ditur një zëdhënës i një organizate palestineze. Të mërkurën nga bombardimet e ushtrisë izraelite humbën jetën 20 vetë, ndër ta edhe fëmijë. Ndërsa një armëpushim i propozuar nga Egjipti të martën rezistoi vetëm pak orë, pasi Hamasi nuk e respektoi atë.

Ndërkohë një zëdhënëse e ushtrisë izraelite bëri të ditur të enjten se kishte dështuar tentativa për një atentat vetevrasës të militantëve palestinezë në Izrael. Tetë militantë u vranë pas sulmeve nga ajri të ushtrisë izraelitë. Sipas ushtrisë izraelite, 13 të armatosur rëndë hynë rreth 250 metra në Izrael përmes një tuneli jugor të Gazës. Por ushtria izraelite kishte ndërhyrë, duke penguar një atentat të mundshëm në Kibuz Sufa.

Numri i viktimave që nga fillimi i ofensivës izraelite kundër Hamasit më 8 korrik është rritur sipas të dhënave palestineze në 220 vetë, ndër ta së paku 48 fëmijë. Më shumë se 1600 palestinezë janë plagosur. Nga pala izraelite vetëm një civil izraelit ka humbur jetën nga goditjet me raketa të Hamasit.