Demokrati Warnock fiton vendin në Senat në Georgia

Mbajtësi demokrat i postit Raphael Warnock ka fituar zgjedhjet e shumëpritura të pjesshme në shtetin amerikan të Georgias, duke forcuar shumicën e partisë së presidentit Joe Biden në Senat. Pasi u numëruan pothuajse të gjitha votat, Warnock fitoi me 50.8 për qind ndaj ish-yllit të futbollit amerikan Herschel Walker të Partisë Republikane. Kandidati i mbështetur nga ish-presidenti Donald Trump fitoi 49.2 për qind.

Pjesëmarrja ishte e lartë si në qendrat e votimit ashtu edhe në votimet me postë, tha drejtuesi i zgjedhjeve Gabriel Sterling për CNN. "Njerëzit në Georgia ishin shumë të motivuar për të votuar."

Balotazhi sigurisht që nuk kishte rol vendimtar përsa i përket ndarjes së pushtetit në Senatin amerikan. Megjithatë, ai tërhoqi shumë vëmendje, jo vetëm sepse rezultati i Walker-it u pa si një tjetër sinjal për shanset e Trumpit në ofertën e tij tashmë të paralajmëruar për zgjedhjet presidenciale të 2024-ës.

Shumicë e qartë në Senat

Gjatë Midterms, zgjedhjeve të ndërmjetme për Kongres në nëntor, Partia Demokratike vërtet që humbi shumicën në Dhomën e Përfaqësuesve. Por në dhomën tjetër të Kongresit, Senat, ajo ishte në gjendje të mbronte shumicën e saj shumë të vogël. Demokratët kishin garanci se do të merrnin 50 nga 100 mandatet. Partia në pushtet tani ka fituar vendin e 51-të me Georgia dhe kështu kontrollon qartë dhomën e rëndësishme.

Fakti që u zhvillua një balotazh midis Warnock-ut, 53 vjeç, dhe Walker-it, shtatë vjet më i madh se ai, është për shkak të ligjit zgjedhor të Georgias. Shteti jugor kërkon që një kandidat të marrë më shumë se 50 për qind të votave. Më 8 nëntor, Warnocku doli përpara Walker-it, por nuk mori një shumicë absolute. Në raundin e parë kishte ende një kandidat të tretë.

Sfiduesi bie në sy negativisht

Pastori baptist Warnock është senatori i parë amerikan me ngjyrë i Georgias. Por në raundin e dytë, sytë ishin kryesisht te sfiduesi i tij, pasi Walker-i gjatë fushatës tërhoqi vëmendjen negativisht. I sapoardhuri në politikë kishte zbukuruar biografinë e tij, për të mos përmendur akuzat për dhunë në familje të ngritura ndaj Walker-it nga ish-bashkëshortja e tij. Përveç kësaj, dy gra e akuzuan atë se i kishte shtyrë të abortonin pasi kishin pasur një lidhje me të. Kjo tërhoqi edhe më shumë vëmendjen, pasi Walkeri e paraqiste veten si kundërshtar ultra-konservator i abortit. Ai i mohoi këto akuza.

Kandidati që u bë legjendar si futbollist i kolegjit ka tërhequr rregullisht tallje nga komentuesit me deklarata të çuditshme, si p.sh. kur bëri fantazi për vampirët dhe ujqërit gjatë një takimi të fushatës.

Biden dhe Trump nuk u shfaqën

Presidenti Biden nuk e vizitoi Georgian gjatë fushatës zgjedhore, duke pasur parasysh mbështetjen e tij të ulët. Në vend të kësaj, në këtë shtet shkoi ish-presidenti demokrat ende popullor Barack Obama erdhi në shtet. Përqindja e votuesve me ngjyrë në Georgia është më e lartë se në shumë shtete të tjera.

Mbështetësi i Walker-it, Trumpi, gjithashtu nuk shkoi në Georgia. Duke u përballur me refuzimin e fortë nga votuesit e mesit politik, 76-vjeçari e lejoi veten të bindet nga këshilltarët e tij se do t'i bënte Walker-it më shumë dëm sesa mirë në fushatën elektorale. Të hënën në mbrëmje, Trump e mbështeti kandidatin e tij në një aktivitet digjital - pa dobi.

aud/sti/se/mak (afp, ap, dpa, rtr)