La Palma: Vullkani lëshon blloqe të mëdha llave të shkrirë

Autoritetet spanjolle thanë se po mbajnë nën mbikqyrje një rrjedhje të rrezikshme llave në ishullin e La Palma-s, ku prej rreth tre javësh vullkani ka kaluar në gjendje aktive. Shpërthimi u shkaktua nga një kolaps i pjesshëm i konit pranë kanalit të emetimit të vullkanit. 

Instituti Gjeologjik Kombëtar i Spanjës (ING) tha se së fundmi janë ndjerë 21 lëvizje sizmike, më e madhja 3.8 e shkallës Rihter, e cila shkaktoi dridhje toke në fshatrat e Mazo, Fuencaliente dhe El Paso.

Ky Institut publikoi pamje nga rrjedhjet e llavës, blloqet gjigante të së cilës rrokulliseshin poshtë kodrave.

Në një video të postuar në Twitter, blloqet e saj shihen duke pluskuar në një lumë të tërë llave dhe duke lëvizur me një shpejtësi marramendëse.

Instituti Vullkanik i Ishujve Kanarie raportoi se rrjedhja e llavës, që arriti temperaturën deri në 1240 gradë Celsius, shkatërroi ndërtesat e pakta që kishin mbijetuar deri tani në fshatin Todoque.

Rrëzimi i pjesshëm i konit

Të shtunën (09.10), ING raportoi se kishte ndodhur një kolaps i pjesshëm pranë kanalit të emetimit të vullkanit. Kjo thuhet se shkaktoi krijimin e shkëmbinjve vullkanikë.

"Rënia e pjesës veriore të vullkanit Cumbre Vieja ka shkaktuar shkëputjen e blloqeve të mëdha dhe daljen në pah të rrjedhave të reja në zona tashmë evakuuara” - shkroi në Twitter Departamenti spanjoll i Sigurisë Kombëtare.

"Llava ka arritur deri pranë zonës industriale dhe ndërtesave të reja të Camino de la Gata” - bëri të ditur Agjencia.

Instituti Vullkanik i Ishujve Kanarie raporton se deri tani janë shkatërruar rreth 1.186 ndërtesa, si pasojë e shpërthimit të vullkanit Cumbre Vieja, që vijon prej 19 shtatorit.

Rreth 493 hektarë tokë janë gllabëruar nga lumenjtë e llavës, bëri të ditur Miguel Ángel Morcuende, drejtori teknik i organizatës së Planit të Emergjencës për Ishujt Kanarie, Pevolca.

Rreth 6000 banorë të La Palma-s (nga 83.000 në total) janë evakuuar nga shtëpitë e tyre si pasojë e shpërthimit vullkanik.