Rutte aanza kazi ya ukatibu mkuu wa NATO

Baada ya kuwashukuru washirika wote wa Muungano huo wa kijeshi kwa kumuamini kwenye dhima hiyo ya uongozi, Rutte aliahidi kuendeleza malengo ya mtangulizi wake, Jens Stoltenberg, ya kuuimarisha muungano huo wa kijeshi.

Soma zaidi: Huyu ndiye mkuu mpya wa NATO

"Ni fahari kubwa kwangu mimi kufuata nyayo zako kama katibu mkuu na kuvaa kiatu chako kikubwa. Sote tunaamini kwamba mshikamano imara ni msingi wa muungano wetu na naweza kukuhakikishia kwamba nitafanya juhudi kadri ninavyoweza kuhakikisha kwamba muungano huu utabakia thabiti." Alisema Rutte.

Rutte anachukuwa wadhifa huo katika kipindi kigumu kwa muungano huo wa kijeshi kwa washirika wake wa nchi za Magharibi, ukikabiliwa na kitisho zaidi cha uchokozi wa Urusi huku ukiendeleza juhudi za kuisaidia Ukraine kiulinzi dhidi ya uvamizi wa Rais Vladmir Putin.