القاعدہ کی سعودی ولی عہد کو ’گناہوں‘ سے باز رہنے کی تنبیہ

ولی عہد شہزادہ محمد بن سلمان نے ملک کی چند سخت گیر پالیسیوں کو تبدیل کرتے ہوئے خواتین کو ڈارئیونگ کی اجازت دینے کے علاوہ سینما گھروں پر عائد پابندیوں کو اٹھانے جیسے اقدامات کیے ہیں۔ 

امریکی انٹیلیجنس گروپ SITE کے مطابق انہیں یمن میں سرگرم جہادی تنظیم القاعدہ کے ذیلی گروپ کے ’مدد نیوز بولیٹن‘ سے جو پیغام ملا ہے، اس میں القاعدہ کی جانب سے کہا گیا ہے کہ، ’’ بن سلمان کے نئے دور میں مساجد کو مووی تھیٹر سے ادل بدل کر دیا گیا ہے۔ انہوں نے  اماموں کی کتابوں کا متبادل مشرق اور مغرب کے مُلحدوں اور لا دینوں کی لغویات کو قرار دیا ہے اور اخلاقی گراوٹ اور کرپشن کے لیے دروازے کھول دیے ہیں۔‘‘

سعودی عرب: پہلا سنیما رواں ماہ کُھل جائے گا

سعودی عرب میں آمریت پسندانہ جدیدیت بلاجواز ہے، تبصرہ

القاعدہ نے اپنے بیان میں جدہ میں اپریل کے مہینے میں ہوئے WWE Royal Rumble ریسلنگ مقابلے کو بھی تنقید کا نشانہ بنایا ہے جس میں نوجوان مسلم مرد و خواتین کے مخلوط اجتماع کا اہتمام کیا گیا تھا۔ بیان کے مطابق، ’’ غیر ملکی ریسلرز نے مسلم مرد و زن کے اجتماع کے سامنےغیر یقینی طور پر اپنے  جسم کے پوشیدہ حصوں کو ظاہر کیااور ان میں سے اکثر نے صلیب کا نشان پہنا ہوا تھا۔ لیکن فاسدوں کا بس صرف اتنا ہی نہیں چلا بلکہ انہوں نے ہر رات کے لیے میوزیکل کانسرٹس، موویز اور سرکس کے شوز کا بھی اعلان کیا۔‘‘

سعودی ولی عہد محمد بن سلمان اپنی قدامت پسند سلطنت کو جدید بنانے کے لیے ’اعتدال پسند اسلام‘ کی ترویج کا وعدہ کرتے ہوئے اس پر عمل پیرا ہیں۔ اسی سلسلے میں انہوں نے کئی اصلاحات متعارف کروائی ہیں۔اس میں نیا نصاب تعلیم کا تعارف بھی ہے جس میں اس بات کو یقینی بنایا جائے گا کہ تعلیمی نصاب پر کالعدم اخوان المسلمون کی چھاپ کو ختم کیا جائے۔ اس کے علاوہ خواتین کو اسٹیڈیم میں داخل ہو کر میچ دیکھنے کے علاوہ گاڑی چلانے کی اجازت بھی دی گئی ہے۔ 

ع ف/ ع ح (اے ایف پی)