عمران خان ثالثی کے لیے سعودی عرب اور ایران جا سکتے ہیں

اسلام آباد سے جمعرات دس اکتوبر کو موصولہ نیوز ایجنسی روئٹرز کی رپورٹوں کے مطابق پاکستانی دفتر خارجہ کے ترجمان محمد فیصل نے آج صحافیوں کو بتایا کہ کافی زیادہ امکان ہے کہ وزیر اعظم عمران خان ممکنہ طور پر جلد ہی ہمسایہ ملک ایران اور خلیج کی عرب بادشاہت سعودی عرب کے دورے کریں گے۔ اسلام آباد کی طرف سے چند ہفتے قبل ہی کہا گیا تھا کہ واشنگٹن نے پاکستان سے درخواست کی ہے کہ وہ تہران کے ساتھ رابطوں کے سلسلے میں اپنی طرف سے ثالثی کوششیں کرے۔

اس بارے میں محمد فیصل نے صحافیوں کو بتایا، ''اس بات کا کافی زیادہ امکان ہے کہ پاکستانی وزیر اعظم عنقریب ہی سعودی عرب اور ایران کے دورے کریں گے۔ اس سلسلے میں کسی بھی نئی پیش رفت کی تفصیلات بروقت جاری کر دی جائیں گی۔‘‘

روئٹرز نے لکھا ہے کہ پاکستانی دفتر خارجہ کے آج کے اس اعلان سے قبل عمران خان نے گزشتہ ماہ اپنے ایک بیان میں کہا تھا کہ امریکی صدر ڈونلڈ ٹرمپ نے انہیں درخواست کی ہے کہ وہ تہران اور واشنگٹن کے مابین کشیدگی میں کمی کے لیے کوششیں کریں۔

پاکستانی دفتر خارجہ کے ترجمان نے جمعرات کے روز ایک نیوز بریفنگ میں اس بارے میں پوچھے گئے ایک سوال پر کوئی بھی تبصرہ نہ کیا کہ آیا عمران خان کے ایران اور سعودی عرب کے آئندہ ممکنہ دوروں کا تعلق امریکا کی طرف سے کی گئی ثالثی کی درخواست سے ہے۔

ایران اور امریکا کے مابین پائی جانے والی کشیدگی کے علاوہ ان دنوں ایران اور سعودی عرب کے مابین بھی کشیدگی عروج پر ہے۔ اس نئے تناؤ کی وجہ سعودی عرب میں چودہ ستمبر کو تیل کی انتہائی اہم تنصیبات پر کیے جانے والے وہ ڈرون اور میزائل حملے بنے تھے، جن کی ذمے داری یمن کے حوثی باغیوں نے قبول کر لی تھی۔

ان حملوں کے بارے میں تاہم امریکا اور سعودی عرب کا الزام یہ تھا کہ ان کے پیچھے ایران کا ہاتھ تھا۔ لیکن ایران نے اپنے خلاف ان الزامات کی اسی وقت بھرپور تردید کر دی تھی۔

م م / ش ح (روئٹرز)