چڈی کے کپڑے سے چہرے کا ماسک تیار کیا جائے گا

فیشن ویئر کی یہ جاپانی کمپنی کورونا وائرس کی وبا کے آغاز میں چہرے کے ماسکس تیار کرنے سے گریز کر رہی تھی لیکن بعد میں کسٹمرز کی بڑھتی مانگ کی وجہ سے انہوں نے یہ ماسکس تیار کرنے کا فیصلہ کیا ہے۔ 
یونیکلو کے ترجمان کے مطابق ’ایئرزم انڈر ویئر‘ کے لیے استعمال کیے جانے والے خاص فیبرک سے یہ ماسکس تیار کیے جائیں گے۔ انہوں نے ان ماسکس کی قیمت اور دستیابی کی حتمی تاریخ کا ابھی اعلان نہیں کیا۔

نرم اور ریشمی احساس
ایئرزم کے انڈر گارمنٹس خاص طور پر نرم اور ریشمی احساس کے لیے جانے جاتے ہیں۔ اس جاپانی کمپنی کے مطابق یہ فیبرک شدید گرم موسم کے دوران نمی اور حرارت کو جزب کرتے ہوئے پہننے والے کو ٹھنڈک کا احساس دیتا ہے۔

یہ بھی پڑھیے: فیس ماسک کی جعل سازی، پولیس کی کارروائی
جاپان میں کورونا وائرس کی وبا پھیلنے کے بعد سے ملک میں چہرہ اور ناک ڈھانپنے کے حفاظتی ماسکس کی سپلائی میں کمی دیکھی جا رہی تھی۔ اس وجہ سے ٹوکیو میں اسپورٹس ویئر اور اسمارٹ فون کی اسکرین تیار کرنے والی کمپنیاں بھی اب ماسکس بنا رہی ہیں۔

جاپان میں آج پچیس مئی تک اس مہلک وائرس سے سولہ ہزار چار سو پچاس سے زائد افراد متاثر جبکہ آٹھ سو تیس سے زائد ہلاکتیں ہو چکی ہیں۔ تاہم وہاں اب تک تیرہ ہزار تین سو تیس سے زائد افراد دوبارہ صحت یاب ہونے میں کامیاب ہو چکے ہیں۔
ع آ / ع س (نیوز ایجنسیاں)