اٹلی میں بدنام زمانہ سسیلین مافیا کے خلاف چھاپے

میڈیا رپورٹوں کے مطابق اطالوی حکام نے بدھ کے صبح اطالوی علاقے پالیرمو میں چھاپے مارتے ہوئے سسلین مافیا کے متعدد ارکان کو گرفتار کر لیا ہے۔

پولیس نے اس حوالے سے مزید معلومات فراہم کرنے سے گریز کیا ہے لیکن یہ ضرور بتایا ہے کہ گرفتار شدگان کا تعلق نیویارک کی بدنام زمانہ گامبینو فیملی سے ہے۔

اطالوی سکیورٹی ادارے ملک کے مشہور 'انزیریلو قبیلے‘ کے خلاف تحقیقات کا سلسلہ جاری رکھے ہوئے ہیں۔ اس خاندان کا تعلق 'کوسا نوسٹرا‘ گروپ سے ہے۔

 کوسا نوسٹرا گروپ کے ارکان اسی کی دہائی میں بحیرہ روم کے جزیرے کو چھوڑ کر دیگر مختلف علاقوں میں آباد ہو گئے تھے۔ اس وقت اس گروپ میں اندرونی لڑائی کا آغاز ہو گیا تھا اور انزیریلو قبیلہ انتہائی دہشت ناک سمجھے جانے والے مافیا باس سلواتورے (ٹوٹو) سے شکست کھا چکا تھا۔

کوسا نوسٹرا اٹلی کا ایک مشہور جرائم پیشہ گروہ ہے۔ سن دو ہزار سترہ میں اس گروپ کا باس ٹوٹو انتقال کر گیا تھا اور تب سے اس گروپ میں مزید دراڑیں پڑ چکی ہیں۔

ایف بی آئی بھی شامل

ماضی میں 'انزیریلو خاندان‘ امریکا فرار ہو گیا تھا لیکن سن دو ہزار میں اس خاندان کی کوسا نوسٹرا گروپ سے صلح ہو گئی اور یہ واپس اٹلی آ کر آباد ہو گیا تھا۔

بدھ کی صبح اس مافیا گروہ کے خلاف کی گئی کارروائیوں میں تقریبا دو سو پولیس اہلکار شامل تھے اور ان میں سے متعدد کا تعلق امریکی فیڈرل بیورو آف انویسٹی گیشن (ایف بی آئی) سے بھی تھا۔ مجموعی طور پر انزیریلو اور گامبینو خاندان کے انیس افراد کے وارنٹ گرفتاری جاری کیے گئے تھے۔

پولیس کی طرف سے جاری ہونے والے ایک بیان کے مطابق، ''تحقیقات سے پتا چلا ہے کہ کوسا نوسٹرا پالیرمو اور امریکا کے طاقتور جرائم پیشہ گروپوں، خاص طور پر نیویارک کے گامبینو خاندان کے درمیان نئے تعلقات وجود میں آئے ہیں۔‘‘

ابتدائی چھاپوں میں اس مافیا کے تین ملین کے اثاثے بھی ضبط کر لیے گئے ہیں۔

ا ا / ش ح (روئٹرز، ڈی پی اے)