بھارت: اہانت پیغمبر تنازعہ پر دو ہفتے بعد کیس درج

پیغمبر اسلام کے خلاف بی جے پی کے دو رہنماؤں کے اہانت آمیز بیانات کے دو ہفتے بعد دہلی پولیس نے ان دونوں کے علاوہ کئی دیگر افراد کے خلاف بھی مذہبی منافرت پھیلانے اور سماجی ہم آہنگی کو بگاڑنے کے الزامات کے تحت باضابطہ کیس درج کر لیے ہیں۔

جن دیگر افراد کے خلاف ایف آئی آر درج کی گئی ہے ان میں حکمراں بی جے پی کی معطل ترجمان نوپور شرما، دہلی بی جے پی کے برطرف ترجمان نوین کمار جندل، آل انڈیا مسلم مجلس اتحاد المسلمین کے صدر اور رکن پارلیمان اسد الدین اویسی، صحافی صبا نقوی، پیس پارٹی کے ترجمان شاداب چوہان، مفتی مولانا ندیم، گلزار انصاری، عبدالرحمان، انل کمار مینا، نماز جمعہ پر پابندی کا مطالبہ کرنے والی ہندو مہاسبھا کی عہدیدار پوجا شکن پانڈے اور ہردوار منافرت انگیز تقریر کیس میں ضمانت پر رہا یتی نرسنگھا نند شامل ہیں۔

تاخیر سے کارروائی پر سوالات

پیغمبر اسلام کی توہین کے خلاف پولیس کی جانب سے کارروائی میں اتنی تاخیر پر مختلف حلقوں سے مودی حکومت اور انتظامیہ کے رویے پر سوالات اٹھائے جا رہے ہیں۔ یہ پوچھا جا رہا ہے کہ آخر 16 سے زیادہ ملکوں کی جانب سے سخت بیانات کے بعد ہی بی جے پی رہنماؤں کے خلاف کارروائی کیوں کی گئی اور یہ سوال بھی کیا جا رہا ہے کہ کیا بی جے پی رہنماؤں کے ساتھ دیگر کے خلاف ایف آئی آر درج کرنا معاملے میں توازن بنانے کی کوشش تو نہیں ہے؟

یہ ایگریسیو ایکٹ ہے، رحمانی

جس ٹی وی مباحثے میں اہانت پیغمبر اسلام کا تنازعہ پیدا ہوا اس میں حصہ لینے والے مسلم کاؤنسل آف انڈیا کے صدر ڈاکٹر تسلیم احمد رحمانی نے ڈی ڈبلیو اردو سے بات چیت کرتے ہوئے کہا، "یہ توازن بنانے کی کوشش نہیں ہے۔ یہ بیلنسنگ ایکٹ نہیں بلکہ ایگریسیو ایکٹ ہے۔ چونکہ نوپور شرما اور نوین جندل حکمراں طبقے سے تعلق رکھتے ہیں اس لیے ان کا کچھ زیادہ نہیں بگڑے گا لیکن دوسرے لوگوں کے خلاف سخت کارروائی ہو سکتی ہے۔"

’فاشسٹ سرکار‘

تسلیم رحمانی نے مزید کہا، "حکومت یہ دکھانا چاہتی ہے کہ وہ جو چاہے کر سکتی ہے۔ اگر دہلی یونیورسٹی کا کوئی پروفیسر حکومت کے خلاف ٹوئٹ کرتا ہے تو اسے فوراً گرفتار کر لیا جاتا ہے۔ دراصل یہ فاشسٹ سرکار ہے۔‘‘ ان کے بقول سب سے زیادہ افسوس ناک اور خطرنا ک بات یہ ہے کہ مودی حکومت کے رویے سے ملک کے صرف ایک طبقے کو ہی نقصان نہیں پہنچ رہا ہے بلکہ اس سے بھارت کے خارجی تعلقات بھی متاثر ہو رہے ہیں۔

دہلی کے ڈپٹی پولیس کمشنر کے پی ایس ملہوترا نے بتایا، "مختلف مذاہب سے تعلق رکھنے والے کئی افراد کے خلاف معاملہ درج کیا گیا ہے۔ ہم اس بات کی تفتیش کریں گے کہ سماج میں بدامنی پھیلانے کے لیے سوشل میڈیا پر ان لوگوں کا کیا کردار رہا ہے۔"

تاہم ابھی یہ واضح نہیں ہے کہ جن لوگوں کے خلاف کیس درج کیے گئے ہیں وہ کسی کی شکایت پر کیے گئے ہیں یا دہلی پولیس کی سائبر یونٹ نے اپنی جانب سے یہ کارروائی کی ہے۔

نصیر الدین شاہ کا بیان

پیغمبر اسلام کے تنازعے کے درمیان بالی وڈ کے معروف اداکار نصیر الدین شاہ نے وزیر اعظم نریندر مودی سے اپیل کی ہے کہ وہ ملک میں نفرت کے بڑھتے ہوئے زہر کو روکنے کے لیے اقدامات کریں۔

ایک ٹی وی چینل کو انٹرویو دیتے ہوئے نصیر الدین شاہ کا کہنا تھا کہ ہردوار کی دھرم سنسد میں جس طرح کی اشتعال انگیز تقریریں کی گئیں اگر وہ مناسب نہیں تھیں تو وزیر اعظم مودی کو چاہیے کہ وہ اس کا اظہار کریں کہ ایسی چیزیں انہیں پسند نہیں ہیں۔