’ایران سے ابھی نمٹنا بہتر ہو گا‘، اسرائیلی وزیر اعظم

تل ابیب سے اتوار چھ مئی کو موصولہ نیوز ایجنسی ڈی پی اے کی رپورٹوں کے مطابق اسرائیلی وزیر اعظم بینجمن نیتن یاہو نے کہا کہ ان کا ملک اس بات کا تہیہ کیے ہوئے ہے کہ وہ ایران کو اپنے خلاف ’جارحیت‘ سے روک دے گا۔

اگر امریکا جوہری معاہدے سے نکلا تو مشرق وسطیٰ کا امکانی منظر

شام: ’مشتبہ اسرائیلی‘ حملہ، بیس سے زائد ایرانی جنگجو ہلاک

نیتن یاہو نے یروشلم میں اسرائیلی کابینہ کے ہفتہ وار اجلاس کے آغاز پر کہا، ’’چاہے اس کے لیے جدوجہد ہی کرنا پڑے، ایران کو ابھی روکنا اور اس کا سامنا کرنا بعد میں ایسا کرنے سے بہتر ہو گا۔‘‘

ڈی پی اے نے کابینہ کے اجلاس میں اسرائیلی سربراہ حکومت کے اس موقف کا لفظ بہ لفظ حوالہ دیتے ہوئے لکھا ہے، ’’ایسی قومیں، جو اپنے خلاف قاتلانہ جارحیت کی روک تھام کے لیے بروقت اپنا ردعمل ظاہر کرنے میں ناکام رہیں، انہیں بعد میں بہت بھارتی قیمت چکانا پڑی۔ ہم صورت حال میں مزید کشیدگی اور کھچاؤ نہیں چاہتے لیکن ہم ہر طرح کے حالات کے لیے تیار ہیں۔‘‘

بینجمن نیتن یاہو گزشتہ کئی مہینوں سے شام میں ایرانی فوجی موجودگی کے بارے میں اپنے طور پر ’خطرے کی گھنٹی‘ بجانے کی کوشش کر رہے ہیں۔ ان کا دعویٰ ہے کہ تہران حکومت لبنان میں اپنی حامی شیعہ ملیشیا حزب اللہ کے ساتھ مل کر شام میں اسرائیل کے خلاف ایک نیا محاذ کھولنا چاہتی ہے۔ حزب اللہ کے جنگجو اس وقت شام میں موجود ہیں اور صدر اسد کے حامی دستوں کے ساتھ مل کر اسد مخالف قوتوں کے خلاف لڑ رہے ہیں۔

اسی طرح ایران نے بھی، جو شامی صدر بشار الاسد کا قریبی اتحادی ہے، کئی سالہ خانہ جنگی سے تباہ ہو چکے ملک شام میں اپنے فوجی مشیر تعینات کر رکھے ہیں اور کئی ذرائع کے مطابق شام میں ایرانی شیعہ رضاکار اور جنگجو بھی اسد حکومت کی حمایت میں لڑائی میں حصہ لے رہے ہیں۔ تہران حکومت کا کہنا ہے کہ وہ شام میں جو کچھ بھی کر رہی ہے، دمشق میں اسد حکومت کی حمایت میں اور رضا مندی سے کر رہی ہے۔

یمنی جنگ میں یورپی ممالک مداخلت سے کتراتے کیوں ہیں؟

امریکا کا شام سے فوجی انخلاء کا کوئی ارادہ نہیں، روسی وزیر

دوسری طرف اسرائیل کا یہ کہنا ہے کہ ایران شام میں مقامی اینٹی ایئر کرافٹ سسٹم، زمین سے زمین پر مار کرنے والے میزائلوں اور ڈرون طیاروں کے سلسلے میں اس لیے دمشق حکومت کی مدد کر رہا ہے کہ یوں ’اسرائیل کو نقصان‘ پہنچایا جا سکے۔

ماہرین کے مطابق ایران اپنے خلاف ان الزامات کو قطعی غلط قرار دیتا ہے اور اسرائیلی وزیر اعظم نیتن یاہو کے آج اتوار چھ مئی کے اس بیان کو اس پس منظر میں بھی سمجھا جا سکتا ہے کہ بارہ مئی میں اب ایک ہفتے سے بھی کم کا وقت رہ گیا ہے۔

’روس شام میں اسرائیلی کارروائیوں کو محدود نہیں کر سکتا‘

شام پر امريکی و اتحاديوں کے حملے، يورپی رياستیں منقسم

بارہ مئی وہ ڈیڈ لائن ہے، جب تک امریکی صدر ٹرمپ کو یہ فیصلہ کرنا ہے کہ آیا امریکا اب تک کی طرح ایران کی عالمی طاقتوں کے ساتھ جوہری ڈیل کا حصہ رہتے ہوئے اس پر کاربند رہتا ہے یا صدر ٹرمپ واشنگٹن کے اس ڈیل سے اخراج کا اعلان کرتے ہوئے تہران پر امریکی پابندیاں بحال کر دیتے ہیں۔

اسرائیل کی، جو ایران کو اپنا بڑا حریف ملک سمجھتا ہے، خواہش یہی ہے کہ امریکا کو ایرانی جوہری ڈیل سے نکل جانا چاہیے جبکہ اس معاہدے پر دستخط کرنے والے باقی سبھی ممالک، خاص کر یورپ میں جرمنی، فرانس اور برطانیہ بھی، اس حق میں ہیں کہ ڈونلڈ ٹرمپ ایسا نہ کریں اور ایرانی جوہری معاہدے پر آئندہ بھی عمل درآمد ہوتا رہنا چاہیے۔

شام پر حملہ ایک جرم ہے، ایرانی سپریم لیڈر

’خفيہ ايٹمی پروگرام سے متعلق اسرائيلی الزام بے بنياد ہے‘

اسرائیل سن 2015ء میں طے پانے والے ایرانی جوہری معاہدے کے اس وقت بھی خلاف تھا اور اب بھی ہے۔ اس کا کہنا ہے کہ اس معاہدے کے باوجود ایران کو محض چند برسوں میں ممکنہ طور پر ایٹمی ہتھیار تیار کر لینے سے نہیں روکا جا سکے گا۔ لیکن ایران کے کئی دورے کرنے والے بین الاقوامی ایٹمی توانائی ایجنسی کے ماہرین بار بار کہہ چکے ہیں کہ تہران حکومت نے اس ڈیل کے ساتھ اپنے متنازعہ ایٹمی پروگرام کو محدود کر دینے کا جو وعدہ کیا تھا، وہ اس پر پوری طرح عمل پیرا ہے۔

م م / ع ب / ڈی پی اے