ایسٹونیا بھی یورو زون میں شامل ہوگا

شدید مالی بحران اورگزشتہ دنوں کے دوران بین الاقوامی منڈیوں میں یورپ کی مشترکہ کرنسی یورو کی گرتی ہوئی قدر کے باوجود ایسٹونیا نے اگلے برس سے یورو کو اپنے ہاں قانونی کرنسی کے طور پر رائج کرنےکا فیصلہ کیا ہے۔ لکسمبرگ میں یورو زون کے ایک اجلاس میں ایسٹونیا کو اس مالیاتی اتحاد کا حصہ بنانے کا فیصلہ کیا گیا۔

یوروگروپ کے سربراہ ژاں کلوڈ یُنکر نے بتایا کہ ایسٹونیا نے اس حوالے سے تمام ضروری شرائط پوری کر دیں ہیں اور تالن حکام نے یکم جنوری 2011ء سے یورو زون کا حصہ ہونے کا اعلان بھی کر دیا ہے۔ اس طرح آئندہ برس سے ایسٹونیا میں خرید و فروخت اور ادائیگیوں کے لئے کرُون کی جگہ یورو استعمال کیا جائے گا۔

ایسٹونیا نے یورو زون میں شامل ہونے کے حوالے سے مئی میں یورو زون گروپ کو آگاہ کر دیا تھا جبکہ یورپی یونین کے کمشنر اولی رین نے ان مشکل حالات میں لئے جانے والے اس فیصلے کی تائید کی تھی۔ انہوں نے کہا یورو زون کی کامیابی کا ثبوت یہ ہے کہ ان حالات میں بھی یورو زون میں شامل ہونے کے لئے تو درخواستیں موجود ہیں لیکن کوئی بھی ملک اس مالیاتی اتحاد سے نکلنا نہیں چاہتا۔ تالن حکام کی جانب سے یہ ایک مثبت فیصلہ ہے۔

یورپی یونین میں شامل تمام ریاستوں پر یہ لازم ہے کہ جب وہ یورو زون میں شمولیت کے لئے رکھی گئی مطلوبہ شرائط پوری کر دیں، تو انہیں اپنے ہاں یورو کوکرنسی کے طور پر رائج کرنا ہوگا، تاہم برطانیہ اور ڈنمارک دانستہ طور پر اس اتحاد میں شامل نہیں ہونا چاہتے۔ یورو زون کے قوانین کے مطابق اس مالیاتی اتحاد میں شامل ہونے کے خواہشمند ممالک کو اپنے بجٹ میں سالانہ خسارے کی شرح تین فی صد تک محدود رکھنا ہوتی ہے اور اصولی طور پر ان کے ریاستی قرضوں کی مجموعی مالیت بھی مجموعی قومی پیداوار کے ساٹھ فی صد سے زیادہ نہیں ہو سکتی۔ لیکن گزشتہ برسوں کے دوران یورو زون میں شامل متعدد ریاستیں کئی بار اس قانون کی خلاف ورزی کر چکی ہیں۔

ژاں کلوڈ یُنکر نےکہا کہ ایسٹونیا نے مالی مشکلات کے دور میں بھی متاثر کن کارکردگی کا مظاہرہ کرتے ہوئے اپنے انتظامات کو بخوبی سنبھالا ہے اور ساتھ ہی یورو زون میں شامل ہونے کے حوالے سے تمام شرائط بھی پوری کی ہیں۔ ایسٹونیا 2004ء سے یورپی یونین کا حصہ ہے اوران چھ برسوں کے دوران وہاں کے اقتصادی حالات میں بہت بہتری آئی ہے۔

رپورٹ: عدنان اسحاق

ادارت : عاطف بلوچ