برلن پریڈ: ہم جنس پسندوں کا جشن، مساوی حقوق کی مانگ

جرمن دارالحکومت برلن کی اکتالیسویں 'ایل جی بی ٹی پریڈ‘ میں تقریباﹰ چھ لاکھ افراد نے ہم جنس پسندوں کے خلاف بڑھتے تعصب کو روکنے کے حق میں آواز بلند کی۔ 'کرسٹوفر اسٹریٹ ڈے‘ پر ہفتہ 27 جولائی کو برلن کی مرکزی شاہراہیں جیسے قوسِ قزح کا منظر پیش کر رہی تھیں۔ LGBT برادری کے 'رینبو فلیگ‘ کو  ایک متنوع معاشرے کی علامت مانا جاتا ہے۔

ہم جنس پسند افراد اور 'ایل جی بی ٹی‘ برادری برلن پریڈ میں  آزادی سے اپنی جنسی شناخت کا جشن مناتے ہیں۔ اس مرتبہ برلن پریڈ میں ہم جنس پسندوں نے جشن کے ساتھ ساتھ LGBT کمیونٹی کے لیے برداشت اور مساوی حقوق کی مانگیں کی۔ اس پریڈ میں شامل ماحولیاتی تبدیلی کے سرگرم کارکنان نے queersforfuture#  کے ہیش ٹیگ کے ساتھ ماحولیاتی تحفظ میں ایل جی بی ٹی کمیونٹی کے کردار کو فروغ دینے کے عزم کا اظہار کیا۔

50 برس قبل نیویارک شہر میں اسٹون وال کے مقام پر ہونے والے پرتشدد واقعات، ہم جنس پسند افراد کے حقوق کے لیے مہم کا نقطہ آغاز ثابت ہوئے تھے۔ ایل جی بی ٹی افراد کے حقوق کو دنیا کے بہت سے ممالک میں تسلیم کیا جا چکا ہے لیکن آج بھی مختلف ممالک میں سیاسی و سماجی سطح پر ہم جنس پسند افراد کے خلاف تعصب اور نفرت دیکھی جاتی ہے۔

برلن میں امریکی سفارتخانے کے سامنے 'رینبو فلیگ‘

امریکی صدر ڈونلڈ ٹرمپ کی جانب سے احکامات جاری کیے گئے کہ دنیا بھر میں قائم امریکی سفارتخانوں میں 'کرسٹوفر اسٹریٹ ڈے‘ کی تقریبات کے موقع پر امریکی پرچم کے ساتھ 'رینبو فلیگ‘ نہیں لہرایا جائے گا۔  تاہم برلن میں امریکی سفیر رچرڈ گرینیل نے اس کا ایک تخلیقی حل یہ نکالا کہ سفارتخانے کی عمارت کی بجائے انہوں نے اس عمارت کے سامنے ایل جی بی ٹی پرچم لہرایا۔ واضح رہے امریکی سفیر رچرڈ گرینیل اعلانیہ طور پر ہم جنس پرست ہیں۔

انتہائی دائیں بازو کے خلاف احتجاج

برلن پریڈ میں موجود متعدد شرکا نے جرمنی کی انتہائی دائیں بازو کی سیاسی جماعت اور قدامت پسند نظریے کے حامل افراد کے خلاف مختلف بینرز بھی اٹھا رکھے تھے۔ اس پریڈ میں شامل دنیا بھر کی ایل جی بی ٹی برادری نے ایک واضح پیغام  دیا کہ ہم جنس پسندوں کے ساتھ امتیازی سلوک کو ختم کیا جائے۔

ع آ / ا ب ا (نیوز ایجنسیاں)