بنگلہ دیش: بچیوں کی ایک اور نسل بربادی کی جانب

بنگلہ دیش میں دو تہائی لڑکیوں کی شادی کم عمری میں ہی کر دی جاتی ہے جبکہ ایک اندازے کے مطابق تیس فیصد لڑکیاں اپنی پندرہویں سالگرہ یا اس سے بھی قبل شادی کے بندھن میں باندھ دی جاتی ہیں۔ انسانی حقوق کی تنظیم ہیومن رائٹس واچ نے بنگلہ دیشی حکومت سے مطالبہ کیا ہے کہ وہ اُس تجویز کو بھی مسترد کر دے، جس میں لڑکیوں کی شادی کی عمر کو اٹھارہ سے کم کر کے سولہ کرنے کا کہا گیا تھا۔ ان میں سے زیادہ تر شادیاں والدین کی مرضی سے ہوتی ہیں۔

بنگلہ دیش آئے دن سمندری طوفانوں یا دوسری قدرتی آفات کی زد میں رہتا ہے۔ ہیومن رائٹس واچ کے مطابق سیلاب اور طوفانوں کے بعد کم عمری میں بچیوں کی شادی بھی کسی بڑی مصیبت سے کم نہیں اور اس کی وجہ سے بہت سے خاندان غربت کی دلدل میں مزید پھنس جاتے ہیں۔ ہیومن رائٹس واچ میں خواتین کے حقوق کے لیے کام کرنے والی ہیتھر بار کہتی ہیں:’’بنگلہ دیش میں کم عمری میں بچیوں کی شادی کو ایک بیماری کہا جا سکتا ہے اور یہ کسی قدرتی آفت سے بھی زیادہ خطرناک ہے۔ لڑکیوں کی ایک اور نسل کو برباد ہونے سے بچانے کے لیے حکومت کو لازمی اور فوری طور پر اقدامات کرنا ہوں گے۔‘‘

گزشتہ برس لندن میں چائلڈ میرج کے موضوع پر ہونے والے ایک سربراہی اجلاس میں بنگلہ دیشی وزیراعظم شیخ حسینہ واجد نے یقین دلایا تھا کہ 2021ء تک پندرہ سال سے کم عمر لڑکیوں کی شادیوں پر قابو پا لیا جائے گا جبکہ 2041 ء تک اس ملک سے چائلڈ میرج ختم کر دی جائے گی۔ اس اجلاس کے دوران شیخ حسینہ نے ان واقعات پر قابو پانے کے لیے حکومتی سربراہی میں ایک منصوبہ تیار کرنے کا کہا تھا تاہم ابھی تک اس سلسلے میں کوئی قدم نہیں اٹھایا گیا۔

ہیومن رائٹس واچ کی رپورٹ کے مطابق بنگلہ دیش میں کم عمری میں شادی غیر قانونی ہے تاہم اس قانون کی سرعام دھجیاں اڑائی جاتی ہیں۔ اس دوران حکام رشوت لے کر پیدائش کی جعلی سند بھی بنا دیتے ہیں۔

ماہرین کہتے ہیں کہ کم عمر بچیوں کو شادی کے بعد اُن کے شوہروں کی جانب سے جنسی اور جسمانی تشدد کا نشانہ بنانے کے خطرات زیادہ ہوتے ہیں۔ ایسے بھی واقعات سامنے آئے ہیں، جن میں بچیوں کو دس اور گیارہ سال کی عمر میں ہی بیاہ دیا گیا ہے۔ طبی حوالے سے اِن بچیوں کا جسم ابھی اتنا طاقت ور نہیں ہوتا کہ وہ جنسی روابط قائم کر سکیں یا کسی بچے کو جنم دے سکیں۔ اس طرح زیادہ تر لڑکیاں صحت کے سنگین مسائل کا شکار بھی ہو جاتی ہیں۔

ہیومن رائٹس واچ کے مطابق زیادہ تر والدین غربت، تعلیم کی کمی اور اِس خوف کی وجہ سے کہ کہیں اُن کی جمع پونجی کسی سیلاب یا طوفان کی نذر نہ ہو جائے، بچیوں کو جلد از جلد بیاہ دینے کا فیصلہ کرتے ہیں۔