بنگلہ دیش: جماعت اسلامی کے بارہویں لیڈر کو پھانسی کی سزا

بنگلہ دیش کی سب سے بڑی اسلامی پارٹی جماعت اسلامی کے نائب صدر مولانا عبدس سبحان کو قتل، نسل کُشی اور تشدد جیسے جرائم کا مرتکب ہونے پر موت کی سزا سنائی گئی ہے۔ اس کے رد عمل میں حکومت مخالف کارکنوں نے ڈھاکا کے مرکزی علاقے میں واقع اس عدالت کے باہر تین پٹرول بم پھینکے۔ مولانا عبدالسبحان کو سنائی جانے والی موت کی سزا کے بعد بنگلہ دیش میں مزید انتشار اور تشدد کی آگ کے بھڑکنے کا اندیشہ ہے۔ جنوبی ایشیا کی اس ریاست میں اپوزیشن اتحاد اور حکومت کے مابین پہلے ہی سنگین کشیدگی پائی جاتی ہے۔ اپوزیشن الائنس، جس میں جماعت اسلامی بھی شامل ہے، مشترکہ طور پر وزیر اعظم شیخ حسینہ کی حکومت کا تختہ اُلٹنے کی کوشش کر رہا ہے۔

جنوری کے اوائل میں مرکزی اپوزپشن پارٹی بی این پی کی لیڈر خالدہ ضیا نے وزیر اعظم شیخ حسینہ کو زیر دباؤ لانے کے لیے اپنے حامیوں کو حکم دیا تھا کہ وہ سڑکوں، ریلوے اور آبی گزرگاہوں کی ناکہ بندی کریں۔ تب سے اب تک ملک گیر سطح پر ہونے والے ہنگاموں میں کم از کم 87 افراد ہلاک ہو چُکے ہیں۔

جسٹس عبید الحسن، بنگلہ دیش کی انٹرنیشنل کرائم ٹریبیونل کے سربراہ ہیں۔ انہوں نے 79 سالہ رہنما عبدالسبحان کے خلاف موت کی سزا سناتے ہوئے کہا، "ملزم کی موت پھانسی کے پھندے پر ہوگی۔" پراسیکیوٹر سلطان محمد نے اخباری نمائندوں کو بیان دیتے ہوئے کہا، "جماعت اسلامی کے لیڈر کی حیثیت سے عبدس السبحان پر لگے نو میں سے چھ جرائم ثابت ہو گئے ہیں۔ انہوں نے پاکستانی فوج کا ساتھ دیا اور جو کچھ کیا اسلام کے نام پر کیا"۔

سبحان جنگی جرائم کی عدالت کی طرف سے سزا پانے والے سترہویں شخص ہیں اور جماعت اسلامی کے بارہویں رکن بھی۔ بنگلہ دیش کی جنگی جرائم کی مقامی ٹربیونل شیخ حسینہ کی حکومت نے بغیر غیر ملکی نگرانی کے قائم کروائی تھی۔

پراسیکیوٹر کا کہنا ہے کہ سبحان جماعت اسلامی اور بنگلہ دیش کے شمال مغربی ضلعے پبنا میں ایک پاکستانی نواز ملیشیا کے سربراہ رہ چُکے ہیں۔ انہوں نے 1971 ء میں سقوط ڈھاکہ کے وقت بنگلہ دیش کے دیہات میں آباد ہندو اقلیت اور سینکڑوں معصوم شہریوں کے قتل عام میں اہم کرادار ادا کیا تھا۔ اُدھر وکیل صفائی نے عبدالسبحان پر لگے الزامات کو بے بنیاد قرار دیتے ہوئے عدالتی فیصلے کے خلاف اپیل کرنے کا عندیہ دیا ہے۔