’بنگلہ دیش میں روہنگیا مہاجرین کی صورتحال کو بہتر کیا جائے‘

گزشتہ برس اگست کے دوران میانمار میں عسکری آپریشن کے تناظر میں فرار ہونے والے تقریباً سات لاکھ روہنگیا مسلمان اس وقت جنوبی بنگلہ دیش میں پناہ لیے ہوئے ہیں۔ کوکس بازار میں قائم عارضی کیمپوں کو دنیا کا سب سے بڑا مہاجرین کا کیمپ کہا جاتا ہے۔ قبل ازیں اقوام متحدہ نے روہنگیا مہاجرین کے خلاف میانمار فورسز کے کریک ڈاؤن کونسلی تطہیر تک سے عبارت کیا تھا۔

تیرہ سالہ روہنگیا ماں، ایسے بہت سے واقعات ہیں

میانمار کی فوج کی جانب سے کیے گئے فوجی آپریشن میں مبینہ طور پر سینکڑوں روہنگیا مسلمان افراد ہلاک ہوئے جبکہ تشدد اور جنسی زیادتی کے ساتھ روہنگیا کے متعدد دیہات اور گھروں کو جلا کر راکھ کر دیا گیا ۔ تاہم میانمار حکومت کی جانب سے ان الزامات کو رد کرتے ہوئے کہا جاتا رہا ہے کہ راکھین میں روہنگیا افراد پر کریک ڈاؤن روہنگیا شدت پسندوں کو نشانہ بنانے کے لیے کیا گیا تھا۔

میانمار اور ڈھاکا کے درمیان گزشتہ برس روہنگیا مسلمان مہاجرین کی واپسی کے حوالے سے ایک معاہدہ طے پایا تھا لیکن روہنگیا پناہ گزین تحفظ، شہریت اور دیگر حقوق کے حصول کی ضمانت کے بغیر واپس جانے سے انکار کر رہے ہیں۔ اس دوران روہنگیا پناہ گزین عارضی کیمپوں میں تعمیر کی گئی بانس کی ضعیف جھونپڑیوں میں زندگی بسر کر رہے ہیں۔

اس تمام صورتحال کے تناظر میں ہیومن رائٹس واچ کے ڈائریکٹر  بل فریلک نے صحافیوں کو ان عارضی کیمپوں کی صورتحال کے بارے میں بتاتے ہوئے کہا، ’’اگر طویل عرصے تک ایک تنگ مقام میں زیادہ لوگ ایک دوسرے کے اتنا قریب رہیں گے تو یہاں مختلف بیماریاں جنم لے سکتی ہیں۔‘‘

اقوام متحدہ اور ورلڈ بینک کے سربراہان کا دورہ بنگلہ دیش

ہیومن رائٹس واچ کے مطابق بنگلہ دیش میں چھ ایسے مقامات موجود ہیں، جہاں 263،000 افراد کو منتقل کیا جا سکتا ہے۔ اس رپورٹ میں درج دیگر تجاویز میں روہنگیا افراد کو قانونی پناہ گزین تسلیم کیے جانے اور تعلیمی اداروں تک رسائی کے ساتھ کسی ممکنہ طوفان سے بچاؤ کے لیے اقدامات پر زور دیا گیا ہے۔

دوسری جانب بنگلہ دیش کے کشمنر برائے مہاجرین عبدالکلام نے مہاجرین کے حقوق کے لیے سرگرم کارکنان کو بتایا کہ حکومتی عہدیدار لاکھوں افراد کی محفوظ مقام پر منتقلی کے حوالے سے کام کر رہے ہیں۔ تاہم کلام کا یہ بھی کہنا تھا، ’’بیشتر روہنگیا مہاجرین حالات جانے بغیر یہ عارضی کیمپ نہیں چھوڑنا چاہتے۔‘‘

ع آ/ ع ت (اے ایف پی)