بيرونی ممالک میں تعطیلات گزارکر جرمنی لوٹنے والوں پر کڑی نظر

موسم گرما کی چھٹياں بیرون ملک گزار کر جرمنی لوٹنے والے افراد کو سرحد پر کورونا کے خلاف حفاظتی ٹیکوں کا کارڈ اور کورونا ٹیسٹ کی منفی رپورٹ چیک کرانا ہوگی۔ جرمنی کے جنوبی صوبے باویریا کے وزیر صحت کلاؤس ہولٹسچک نے )ڈیلٹا میوٹیشن( یا ڈیلٹا متغیر کے پھیلاؤ کے تناظر میں ان قوائد پر سختی سے عمل درآمد پر زور دیا ہے۔

کرسچیئن سوشل یونین کے سیاست دان کلاؤس ہولٹسچک تمام سولہ جرمن ریاستوں کی مشترکہ کونسل، جسے GMK کہتے ہیں، کے چیئرمین اور باویریا کے وزیر صحت بھی ہیں۔ انہوں نے ہفت روزہ اخبار 'بلڈ ام زونٹاگ‘ کو انٹرویو دیتے ہوئے کہا، '' گزشتہ موسم گرما کے برعکس اس بار پورے جرمنی میں جگہ جگہ کورونا ٹیسٹ کے سینٹرز موجود ہیں۔ اب جرمنی میں داخلے سے قبل  کرائے گئے کورونا ٹیسٹ سے کام نہیں چلے گا بلکہ بارڈر کراسنگ اور ہوائی اڈوں پر کورونا ٹیسٹ کا نظام موجود ہے تاکہ سفر سے واپسی پر تازہ ترین ٹیسٹ کے ذریعے سخت کنٹرول رکھا جا سکے۔‘‘ کلاؤس ہولٹسچک نے کہا کہ رياست باویریا پہلے ہی وفاقی حکومت کے ساتھ اس وبا سے نمٹنے کے لیے تمام اقدامات کر رہی ہے۔

بنگلہ دیش میں ڈیلٹا ویریئنٹ کی افزائش، سخت سکیورٹی اقدامات

 

قرنطینہ لازمی 

یورپی ملک پرتگال کا سفر کرنے والوں اور وہاں سے تعطیلات گزارنے کے بعد جرمنی لوٹنے والوں کے لیے گزشتہ منگل سے ہی قوانین سخت تر کر دیے گئے ہیں۔ علاوہ ازیں گزشتہ جمعے کو وفاقی جرمن حکومت نے پرتگال اور روس کو 'وائرس ویریئنٹ‘ یا تغیر شدہ وائرس کے خطرات سے دوچار ملک قرار دینے کا فیصلہ کیا۔ اس درجہ بندی میں ایئر لائنز، بسيں اور ٹرین کمپنیوں پر وسیع تر ' ٹرانسپورٹ پابندی‘ عائد کر دی گئی ہے۔ ان کمپنیوں کو محض جرمن شہریوں یا جرمنی میں رہائش پذیر افراد کو جرمنی لانے کی اجازت ہوگی نیز ان افراد، جنہیں جرمنی آنے کی اجازت ہو گی، کو جرمنی آ کر 14 روز تک لازمی طور پر قرنطینہ ميں رہنا ہو گا۔

کورونا وائرس کے ڈیلٹا ویریئنٹ کے بارے میں ہم کیا جانتے ہیں؟

 

 

ڈیلٹا وائرس کا غلبہ

پرتگال کے سفر و سیاحت کا بندوبست کرنے والی سب سے معروف کمپنی ' اولیمار‘ نے تعطیلات منانے والے سینکڑوں جرمنوں کو جلد از جلد واپس جرمنی لانے پر اتفاق کر لیا ہے۔ جرمن شہر کولون میں قائم اس کمپنی کے مینیجر نے بتایا کہ تمام سیاحوں کو پیر کی شام تک واپس جرمنی آنے کی بروقت پیش کش کر دی گئی ہے۔ وجہ یہ ہے کہ پرتگال میں اس وقت ڈیلٹا وائرس بُری طرح سے پھیل چکا ہے۔ پرتگال کی صحت کی انتظامیہ کے اعداد و شمار کے مطابق اس ملک میں ریکارڈ کیے جانے والے تمام نئے کیسز میں 50 فیصد کیسز ڈیلٹا وائرس کے ہیں جبکہ دارالحکومت لزبن میں 70 فیصد سے زائد نئے کیسز ڈیلٹا وائرس کے ریکارڈ کیے گئے ہیں۔

ایشیا میں کورونا وائرس کی تبدیل شدہ اشکال، دنیا کے لیے بڑا خطرہ

متعدی امراض کی تحقیق کے جرمن ادارے رابرٹ کاخ انسٹیٹیوٹ کے تازہ ترین اعلان کے مطابق پرتگال اور روس میں ڈیلٹا وائرس کے وسیع پیمانے پر پھیلاؤ کے سبب وفاقی جرمن حکومت ان دونوں ممالک سے جرمنی میں مسافروں کے داخلے پر پابندی پر مجبور ہوئی۔ لزبن  اور روس کا میٹروپولیٹن شہر سینٹ پیٹرزبرگ خاص طور سے ڈیلٹا وائرس سے متاثر ہیں۔

روسی دارالحکومت میں نئے ریکارڈ ہونے والے 90 فیصد کیسز ڈیلٹا وائرس کے کیسز ہیں۔

کورونا وائرس کی نئی بھارتی قسم، برطانیہ جرمنی کے لیے خطرہ؟

ک م/ ع س) ڈی پی اے، اے پی ایف، آر ٹی آر(