بھارتی طیارہ غزہ کے لیے امدادی سامان لے کر مصر روانہ ہو گیا

بھارت نے اتوار کوغزہ پٹی میں محصور فلسطینی شہریوں کے لیے مصر کے ذریعے ساڑھے اڑتیس ٹن امدادی سامان بھجوایا ہے۔ وزارت خارجہ کے ترجمان ارندم باغچی نے کہا کہ ملکی فضائیہ کا ایک ٹرانسپورٹ طیارہ تقریباً ساڑھے چھ ٹن طبی امداد اور قدرتی آفات کی صورت میں ضروری دیگر اڑتیس ٹن امدادی سامان فلسطین کے لوگوں کے لیے لے کر مصر کے العریش ہوائی اڈے کے لیے روانہ ہو گیا۔

باغچی نے سوشل میڈیا پر ایک پوسٹ میں کہا، ''اس سامان میں زندگی بچانے والی ضروری ادویات، جراحی کی اشیاء، خیمے، سلیپنگ بیگ، ترپال، سینیٹری مصنوعات، پانی صاف کرنے کی گولیاں اور دیگر ضروری اشیاء شامل ہیں۔‘‘

دہشت گرد تنظیم  حماس نے سات اکتو بر کو اسرائیل پر جان لیوا حملے میں کم از کم 1,400 افراد کو ہلاک کیا تھا، جن میں زیادہ تر عام شہری تھے۔ اس کے جواب میں اسرائیلی فوج نے غزہ پٹی پر زمینی اور فضائی بمباری کا سلسلہ جاری کھا ہوا ہے۔  غزہ پر حکمران حماس کے زیر انتظام وزارت صحت کے مطابق بمباری کی اسرائیلی مہم میں اب تک 4,651  فلسطینی ہلاک ہو چکے ہیں، جن میں سے زیادہ تر عام شہری تھے اور اس بہت گنجان آباد علاقے کا ایک بڑا حصہ کھنڈرات میں تبدیل ہو چکا ہے۔

بھارت نے اسرائیل پر ''دہشت گردانہ حملے‘‘کے لیے حماس کی مذمت کی لیکن اس نے ایک آزاد فلسطینی ریاست کے قیام کے لیے اپنے دیرینہ موقف کو بھی دہرایا ہے۔ اسرائیل نے بارہا غزہ کے شمال میں 1.1 ملین لوگوں پر زور دیا ہے کہ وہ کسی بھی زمینی فوجی کارروائی سے پہلے جنوب کی طرف چلے جائیں۔ مذاکرات اور امریکی دباؤ کے بعد، خوراک، پانی اور ادویات پر مشتمل تقریباﹰ بیس ٹرک ہفتے کے روز مصر سے غزہ میں داخل ہوئے تھے۔

حماس کی حکومت نے ہفتے کے روز فلسطینی علاقے میں ان ٹرکوں کی آمد کے باوجود امداد کی آمد میں کمی پر تنقید کی ہے۔ حکام کے مطابق غزہ کی ساحلی پٹی میں اب  1.4 ملین باشندے بے گھر ہیں۔

ش ر⁄ م م (اے ایف پی)