جرمن خصوصی نمائندے کی مُلا برادر سے ملاقات

جرمن خبر رساں ادارے ڈی پی اے نے قطر میں طالبان کے ترجمان محمد سہیل شاہین کے حوالے سے بتایا ہے کہ افغانستان کے لیے جرمنی کے لیے خصوصی نمائندے مارکُس پوٹزل نے طالبان کے نائب رہنما مُلا غنی برادر سے ملاقات کی ہے۔

سہیل شاہین کے مطابق بدھ یکم مئی کو ہونے والی اس ملاقات میں افغان تنازعے کے حل اور امریکا اور طالبان کے درمیان جاری مذاکرات پر بات ہوئی۔ بیان کے مطابق اس دوران افغانستان میں سویلین ہلاکتوں سے بچنے پر بھی بات ہوئی۔ شاہین کے مطابق پوٹزل نے امن کی بحالی جرمن تعاون اور اس کے لیے جرمنی کے مثبت کردار ادا کرنے کی یقین دہانی کرائی۔

طالبان کی طرف سے جاری ہونے والے اس بیان میں مزید کہا گیا ہے، ’’فریقین نے اس بات پر اتفاق کیا کہ امن سے افغانستان کو فائدہ ہو گا، خطے کو فائدہ ہو گا اور پوری دنیا کو فائدہ ہو گا۔‘‘

مارکُس پوٹزل قبل ازیں 2014ء سے 2016ء کے درمیان افغانستان میں جرمنی کے سفیر کے طور پر خدمات انجام دے چکے ہیں۔

خبر رساں ادارے ڈی پی اے کے مطابق یہ ملاقات ایک ایسے موقع پر ہوئی ہے جب امریکا اور طالبان کے درمیان مذاکرات کا چھٹا دور بدھ یکم مئی سے ہی شروع ہوا ہے۔ دوحہ میں ہی ہونے والے ان مذاکرات کا مقصد افغان تنازعے کا ایک سیاسی حل تلاش کرنے کی کوشش کرنا ہے تاکہ گزشتہ 17 برس سے جاری جنگ کا خاتمہ ہو سکے۔ امریکی فوج کی کسی غیر ملک میں یہ سب سے طویل جنگی مہم بن چکی ہے۔

ڈی ڈبلیو کے ایڈیٹرز ہر صبح اپنی تازہ ترین خبریں اور چنیدہ رپورٹس اپنے پڑھنے والوں کو بھیجتے ہیں۔ آپ بھی یہاں کلک کر کے یہ نیوز لیٹر موصول کر سکتے ہیں۔

ا ب ا / ک م (ڈی پی اے)