جرمن چانسلر کا مجرموں کی ملک بدری کا منصوبہ تنقید کی زد میں

جرمنی میں پناہ گزینوں کی وکالت کرنے والے گروپ پرو ایزیل نے جرمن چانسلر اولاف شولسکی سنگین جرائم میں ملوث مجرموں کو افغانستان اور شام واپس بھیجنے کی تجویز دینے مزمت کی ہے۔ پرو ایزیل کے مینیجنگ ڈائریکٹر کارل کوپ کے آج جمعے کے روز جرمن اخبار آگس برگر آلجیمین میں شائع کردہ بیان میں کہا گیا ہے،''بین الاقوامی قانون واضح طور پر افغانستان اور شام میں کسی بھی ملک بدری کی ممانعت کرتا ہے۔‘‘

کوپ نے جرمن چانسلر شولس کے مجوزہ منصوبوں کو غیر قانونی قرار دیتے ہوئے کہا، '' یہ دونوں ممالک تشدد اور غیر انسانی سزاؤں کے استعمال کے لیے مشہور ہیں۔‘‘ شولس نے جمعرات کے روز ایک بار پھر سنگین جرائم میں ملوث افراد  کو ملک بدر کر کے واپس  افغانستان اور شام بھجوانے کی تجویز پیش کی۔ جرمن چانسلر نے پہلی بار یہ  تجویز جرمنی کے شہر مان ہائیم میں ایک اسلام مخالف ریلی میں چاقو کے وار سے ایک پولیس افسر کی حالیہ موت کے بعد پیش کی تھی۔

شولس نے جرمن پارلیمان کے ایوان زیریں یا بنڈس ٹاگ کو بتایا، ''ایسے مجرموں کو ملک بدر کیا جانا چاہیے۔ چاہے وہ شام اور افغانستان سے ہی کیوں نہ ہوں۔‘‘ انہوں نے مزید کہا، ''سنگین مجرموں اور جن لوگوں سے دہشت گردی کے خطرات لاحق ہیں، ان کی یہاں کوئی جگہ نہیں ہے۔‘‘چانسلر نے اس بات کی قطعی وضاحت نہیں کی کہ وہ یہ کیسے ممکن بنانے کا ارادہ رکھتے ہیں۔

 لیکن  ان کا کہنا تھا کہ وزارت داخلہ اس کے عملی نفاذ پر کام کر رہی ہے اور اس بارے میں افغانستان کے پڑوسی ممالک کے ساتھ پہلے ہی بات چیت کر رہی ہے۔ ایک افغان شہری نے گزشتہ ہفتے جنوب مغربی شہر من ہائم میں اسلام مخالف تحریک پاکس یورپا کی ایک ریلی کے دوران متعدد افراد کو چاقو کے وار کر دیا تھا۔ اس دوران ایک پولیس اہلکار زخموں کی تاب نہ لاتے ہوئے دم توڑ گئےتھے۔

کوپ نے کہا، ''من ہائیم میں ہونے والے حملے نے ہم سب کو چونکا دیا ہے لیکن جرمن حکومت کو بین الاقوامی قانون کو کمزور نہیں کرنا چاہیے۔ اس کے بجائے اسے جرمن آئینی ریاست کے وسائل پر انحصار کرنا چاہیے۔‘‘

انہوں نے مزید کہا، ''تشدد کی ممانعت مجرموں سمیت ہر ایک پر لاگو ہوتی ہے۔ اس اہم اصول کو پامال نہیں کیا جانا چاہیے۔‘‘ اگست 2021 میں طالبان کے قبضے کے بعد سے جرمنی نے کسی کو بھی افغانستان واپس نہیں بھیجا ہے۔ اس سے پہلے بھی یہ معاہدہ تھا کہ صرف مرد خاص طور پر جرائم پیشہ اور ایسے افراد، جن  سے دہشت گردی کا خطرہ لاحق ہے، کو زبردستی واپس کیا جائے گا۔

ش ر⁄ ع ب (ڈی پی اے)