خالدہ ضیاء کی نظر بندی ختم، احتجاج جاری رکھنے کا فیصلہ

بی این پی کی رہنما خالدہ ضیاء کو اس لیے نظر بند کیا گیا تھا تاکہ وہ اپنی حریف اور موجودہ وزیر اعظم شیخ حسینہ کے خلاف عوامی مظاہروں کی قیادت نہ کر سکیں۔ اُس موقع پر ڈھاکہ کے گلشن ڈسٹرکٹ میں بی این پی کے دفتر کے باہر پولیس کے دستے تعینات کر دیے گئے تھے۔ مقامی پولیس کے سربراہ رفیق الاسلام نے خبر رساں ادارے اے ایف پی کو بتایا کہ ’’ ان ( خالدہ ضیاء) کے دفتر کے باہر سے رات کو ہی پولیس کے اضافی دستے ہٹا لیے گئے تھے۔ دو مرتبہ وزیراعظم رہنے والی ضیاء اب آزاد ہیں۔‘‘

دوسری جانب بی این پی نے بھی پولیس کی جانب سے جاری کیے جانے والے بیان کی تصدیق کر دی ہے۔ بی این پی نے کہا کہ آج پیر کے روز بھی سڑکوں کی ناکہ بندی کرنے کا سلسلہ جاری رہے گا۔ اس احتجاج کا اعلان خالدہ ضیاء نے اپنی نظر بندی کے دوران کیا تھا۔ بنگلہ دیش نیشنلسٹ پارٹی کے ترجمان کبیر خان نے بتایا کہ ناکہ بندی جاری رکھنے کے فیصلے میں بی این پی کی قیادت میں سرگرم بیس جماعتی اتحاد نے بھی بھرپور ساتھ دینے کا اعلان کیا ہے۔

اس ناکہ بندی کی وجہ سے بنگلہ دیش سے دیگر ممالک کو ملبوسات کی ترسیل میں رکاوٹیں آ رہی ہیں اور اس صورتحال نے ملکی معیشت پر منفی اثر ڈالا ہے۔ چین کے بعد بنگلہ دیش دنیا بھر میں ملبوسات برآمد کرنے والا دوسرا بڑا ملک ہے۔ ٹرانسپورٹ کے کاروبار سے منسلک افراد کا کہنا ہے کہ انہیں 26 ملین ڈالر یومیہ کا نقصان ہو رہا ہے جبکہ اناج کی ایک بڑی تعداد اس ناکہ بندی کی زد میں آ رہی ہے۔

خالدہ ضیاء کی نظر بندی کے خلاف شروع ہونے والے ملک گیر احتجاج کے دوران تشدد کے مختلف واقعات میں ستائیس افراد ہلاک اور سینکڑوں زخمی ہوئے۔ مقامی میڈیا کے مطابق چار جنوری سے شروع ہونے والے احتجاجی مظاہروں کے دوران 238 گاڑیوں کو نذرِ آتش کیا گیا اور اس سے کہیں زیادہ تعداد میں گاڑیوں کو نقصان پہنچایا گیا۔ بی این پی کا کہنا ہے کہ اُس کے کم از کم دو ہزار کارکنوں کو حراست میں لیا جا چکا ہے۔

خالدہ ضیاء کا مطالبہ ہے کہ وزیر اعظم شیخ حسینہ ملک میں فوری طور پر نئے انتخابات کروائیں۔ بنگلہ دیش میں گزشتہ برس منعقد ہونے والے انتخابات کو متنازعہ قرار دیا جاتا ہے کیونکہ حزب اختلاف کی تمام جماعتوں نے بڑے پیمانے پر دھاندلی کے خدشے کے پیش نظر انتخابی عمل کے بائیکاٹ کا اعلان کیا تھا۔ اس بائیکاٹ کے نتیجے میں شیخ حسینہ واجد کو مزید پانچ سال کے لیے اقتدار مل گیا ہے۔