خیبر ایجنسی میں فضائی کارروائی، چونتیس ہلاک

خبررساں ادارے روئٹرز نے مقامی حکام کے حوالے سے بتایا ہے کہ افغانستان سے ملحق پاکستانی قبائلی علاقے خیبر ایجنسی کی وادی تیراہ کے مختلف علاقوں میں یہ کارروائیاں بدھ کے روز کی گئی ہیں۔ بتایا گیا ہے کہ اہداف بنا کر کی گئی اس فضائی کارروائی میں شدت پسندوں کے ٹھکانوں کو چن چن کر نشانہ بنایا گیا۔ بیس افراد کے زخمی ہونے کی خبریں بھی موصول ہوئی ہیں۔

ایک حکومتی اہلکار نے اپنا نام ظاہر نہ کرنے کی شرط پر روئٹرز کو بتایا، ’’جب دہشت گردوں کے خلاف یہ فضائی حملے شروع ہوئے تو مقامی آبادی اپنے گھروں اور دیہات کو چھوڑ کر وہاں سے بھاگنے لگی۔‘‘ ایک اور اہلکار نے بتایا ہے کہ ہلاک ہونے والے جنگجوؤں کا تعلق کالعدم تحریک طالبان پاکستان اور اس کے ایک اتحادی جنگجو گروہ لشکر اسلام سے ہے۔

پاکستانی فوج کی طرف سے جاری کیے گئے ایک بیان میں کہا گیا ہے، ’’خیبر ایجنسی کی تیراہ وادی میں اہداف بنا کر کی گئی اس فضائی کارروائی میں 34 دہشت گرد مارے گئے ہیں۔‘‘ ایسی اطلاعات بھی موصول ہوئی ہیں کہ جب یہ حملے کیے گئے تو غالبا طالبان کمانڈر مولانا فضل اللہ بھی اسی علاقے میں موجود تھا۔

طالبان کے ذرائع کے مطابق بدھ کو کی گئی اس کارروائی میں وہاں موجود ان کے بیس ساتھی مارے گئے ہیں۔ لشکر اسلام نامی شدت پسند تنظیم نے بھی بیس ہلاکتوں کی تصدیق کی ہے۔ ان کا کہنا ہے کہ اس کارروائی سے قبل ہی مقامی آبادی وہاں سے فرار ہو گئی تھی۔

تیراہ وادی کے ایک رہائشی عبدالرشید نے بتایا، ’’میرے بڑے بھائی نے دیکھا کہ اس حملے کے بعد جنگجوؤں نے اپنے ساتھیوں کی لاشیں تیراہ وادی سے قریبی دیہات میں منتقل کرنا شروع کردیں۔‘‘ عبدالرشید کے بقول اس کا بھائی کچھ دیگر ساتھیوں کے ساتھ اب بھی اپنے گاؤں میں موجود ہے تاکہ وہاں اپنے گھروں اور مویشیوؤں کا خیال رکھا جا سکے۔