روس اور ایران شام میں تشدد ختم کرائیں، جرمن چانسلر

جرمن پارلیمنٹ میں اہم ملکی اور غیر ملکی امور پر اظہار خیال کرتے ہوئے چانسلر انگیلا میرکل نے کہا ہے کہ یورپی یونین شام میں تشدد کے خاتمے کے لیے اپنی کوششوں کو مزید تقویت دے۔ انہوں نے یورپی یونین کو مخاطب کرتے ہوئے کہا کہ وہ روس اور ایران پر اپنے سفارتی دباؤ میں اضافہ کرے تا کہ وہاں پرتشدد حالات کا خاتمہ ہو سکے۔

شام میں خونریزی جاری، ’اڑتالیس گھنٹوں میں ڈھائی سو ہلاکتیں‘

مشرقی غوطہ گولہ باری و بمباری کی زد میں،ایک سو سے زائد ہلاک

شام ميں باغيوں کے خلاف بمباری، شديد جانی و مالی نقصانات

سیز فائر ڈیل لیکن فضائی حملہ، شام میں آٹھ شہری ہلاک

چانسلر میرکل نے کہا کہ شام کی حکومت دہشت گردوں کے خلاف لڑائی لڑنے کے بجائے عام شہریوں کو نشانہ بنانے میں مصروف ہے۔ انہوں نے مزید کہا کہ وہاں بچوں کو ہلاک کرنے کے ساتھ ساتھ ہسپتالوں کو بھی تباہ کرنے کا سلسلہ جاری ہے۔ میرکل نے پارلیمنٹ میں اس صورت حال کو قتل عام قرار دیتے ہوئے اس کی مذمت کی ہے۔ انہوں نے واضح کیا کہ شامی صدر بشار الاسد کے ساتھ ساتھ ایران اور روس کی بھی ذمہ داری ہے کہ عملی اقدامات کرتے ہوئے پرتشدد حالات کا خاتمہ کریں۔ روس اور ایران شام کے حلیف ممالک تصور کیے جاتے ہیں۔

دوسری جانب روس نے کہا ہے کہ جنگ زدہ شام کے شہر مشرقی غوطہ میں صورت حال کی ذمہ داری روس یا روسی اتحادیوں پر عائد نہیں ہوتی۔ کریملن کے ترجمان دیمیتری پَیسکوف نے آج جمعرات 22 فروری کو کہا کہ غوطہ میں حالیہ خونریزی کی وجہ وہ عناصر بنے، جو دہشت گردوں کی حمایت کرتے ہیں۔ پَیسکوف نے کہا کہ اس کے لیے شامی حکومت، روس یا ایران کو قصور وار ٹھہرانا غلط ہو گا کیونکہ دمشق حکومت اور اس کے اتحادی ’دہشت گردوں کے خلاف‘ لڑ رہے ہیں۔ مشرقی غوطہ میں اتوار سے اب تک ڈھائی سو سے زائد افراد ہلاک اور ہزار سے زائد زخمی ہو چکے ہیں۔ باغیوں کے زیر قبضہ یہ شہر ملکی فوج کے محاصرے میں ہے، جہاں شامی فضائیہ کی طرف سے بمباری آج پانچویں روز بھی جاری رہی۔