سری لنکا: ایندھن کے بحران کے سبب اسکول بند

سری لنکا حکومت نے اس سے پہلے بھی 18جون کو ایک ہفتے کے لیے تمام اسکولوں کو بند رکھنے کا اعلان کیا تھا۔

مقامی روزنامے' ڈیلی مرر' کے مطابق سری لنکا کی وزارت تعلیم نے اعلان کیا ہے کہ طویل لوڈ شیڈنگ کی وجہ سے کولمبو شہر کے حدود، نیز دیگر تمام صوبوں کے اہم شہروں میں واقع تمام اسکولوں کو اگلے ہفتے کے دوران بند رکھا جائے گا۔

سری لنکا کی وزارت تعلیم کے سکریٹری نہال رانا سنگھے نے اسکولوں سے آن لائن کلاسیز کا انتظام کرنے کے لیے کہا ہے اور کہا کہ ڈویژنل سطح پر ان اسکولوں میں محدود تعداد میں طلبہ کو آنے کی اجازت ہوگی جہاں طلبہ، اساتذہ اور پرنسپلز کے لیے نقل و حمل کی دشواریاں راہ میں حائل نہ ہوں۔

انہوں نے بتایا کہ سری لنکا کی عوامی سہولیات کمیشن (پی یو سی ایس ایل) ہفتے میں کام کے دنوں میں آن لائن ٹیچنگ میں سہولت کے لیے صبح آٹھ بجے سے دن ایک بجے تک لوڈشیڈنگ نہ کرنے کے لیے رضامند ہوگئی ہے۔

اپنی تاریخ کے بدترین اقتصادی بحران سے دوچار

سری لنکا اس سال مارچ سے ہی اپنی تاریخ کے بدترین اقتصادی بحران کے دور سے گزر رہا ہے۔ اس صورت حال کے خلاف ملک بھر میں زبردست مظاہرے ہوئے جس کے بعد صدر گوٹابایا راجاپاکسے کے بھائی مہندا راجا پاکسے کو وزیر اعظم کے عہدے سے استعفٰی دینے کے لیے مجبور ہونا پڑا۔ ان کی جگہ پر رانل وکرم سنگھے کو مئی میں ملک کا نیا وزیر اعظم مقرر کیا گیا ہے۔

ملک میں خوراک کی افراط زر کی شرح مئی میں 57.4 فیصد تک پہنچ گئی تھی جب کہ خوردنی اشیاء نیز کھانا پکانے، ٹرانسپورٹ اور صنعتوں کے لیے ایندھن کی شدید قلت ہے۔ بجلی کی طویل لوڈ شیڈنگ اب معمول کی بات بن چکی ہے۔

سری لنکا اس وقت غیر ملکی زرمبادلہ کی شدید کمی کی وجہ سے بین الاقوامی قرضوں کی ادائیگی نہیں کرپارہا ہے۔

اقتصادی بحران کا سب سے زیادہ اثر فوڈ سکیورٹی، زراعت، ذریعہ معاش اور صحت کی خدمات تک رسائی پر پڑا ہے۔ پچھلے فصل کے موسم کے دوران پیداوار گزشتہ برس کے مقابلے 40 تا 50 فیصد کم ہوئی۔ جب کہ بیج، کھاد،ایندھن اور قرضے نہیں ملنے کی وجہ سے رواں زرعی موسم بھی شدید خطرے سے دوچار ہے۔

 ج ا/  ص ز (ایجنسیاں)