سیاسی بحران کے باعث اسحاق ڈار کا دورہ واشنگٹن ملتوی

پاکستانی وزیر خزانہ اسحاق ڈار نےبین الاقوامی مالیاتی فنڈ (آئی ایم ایف) اور ورلڈ بینک کے موسم بہار کے اجلاسوں میں شرکت کے لیے اپنا طے شدہ دورہ واشنگٹن منسوخ کر دیا ہے۔  سرکاری حکام نے جمعے کے روز اس دورے کی منسوخی کی وجہ ملک میں جاری سیاسی بحران بتائی۔

اسحاق ڈار نے دس اپریل سے شروع ہونے والی ان میٹنگوں میں شرکت  اور آئی ایم ایف کے اعلٰی حکام اور کثیرالجہتی قرض دہندگان سے تعطل کا شکار فنڈنگ ​​حاصل کرنے کی کوشش کرنا تھی۔

پاکستان کو ادائیگیوں کے توازن سے متعلق بحران سے بچنے کے لیے اس فنڈنگ کی  اشد ضرورت ہے۔ اسلام آباد فروری کے اوائل سے آئی ایم ایف کے ساتھ بات چیت کر رہا ہے تاکہ سن دو ہزار انیس میں ساڑھے چھ بلین ڈالر کے ریسکیو پروگرام کے تحت اسلام آباد حکومت ایک اعشاریہ ایک بلین ڈالر کی قسط حاصل کر سکے۔

دو سرکاری عہدیداروں نے ڈار کے دورے کی  منسوخی کی وجہ سیاسی انتشار کو قرار دیا۔ پاکستان کے ایک معروف انگریزی روزنامے ایکسپریس ٹریبیون نے ملکی وزیر خزانہ کے حوالے سے کہا کہ وہ سیاسی بحران کی وجہ سے اس مجوزہ دورے پر نہیں جا رہے۔ وزارت خزانہ نے البتہ اس ضمن میں  روئٹرز کی جانب سے تبصرہ کرنے کی درخواست کا کوئی جواب نہ دیا۔

حزب اختلاف کی جماعت پی ٹی آئی کے رہنما عمران خان ایک سال قبل پارلیمنٹ میں اعتماد کا ووٹ ہار جانے اور وزیر اعظم کے عہدے سے ہٹائے جانے کے بعد سے حکومت کو چیلنج کر رہے ہیں۔

خان نئے انتخابات کے انعقاد کے لیے دباؤ ڈالنے کی ایک احتجاجی مہم کی قیادت کر رہے ہیں۔ وزیر اعظم شہباز شریف نے عمران خان کا مطالبہ مسترد کرتے ہوئے کہا ہے کہ عام انتخابات بہرحال اس سال کے آخر میں ہوں گے۔ اس ضمن میں  ملکی  سپریم کورٹ پنجاب اور کے پی میں دونوں صوبائی اسمبلیوں کے لیے قبل از وقت انتخابات کے لیے ووٹنگ کا حکم دے چکی ہے لیکن حکومت نے عدالتی حکم کو مسترد کر دیا ہے جبکہ خان اب صوبائی انتخابات چاہتے ہیں۔

وزیر اعظم شہباز شریف کہتے ہیں کہ انتخابات کا انتظام کرنا بہت مہنگا ہے اور اس لیے تمام انتخابات اس سال کے آخر پر  ایک ہی وقت میں ہونا چاہییں۔ حکومت کا یہ بھی کہنا ہے کہ اس سال ووٹنگ کے دو مرحلے انتخابی عمل کے دوران سلامتی کی ذمہ دار ایجنسیوں پر بھی بہت زیادہ دباؤ ڈالیں گے جب کہ اس دوران ملک کو عسکریت پسندوں کے دوبارہ زیادہ ہو جانے والے دہشت گردانہ حملوں کے باعث بھی خطرات کا سامنا ہے۔

پاکستانی سپریم کورٹ نے کہا ہے کہ صوبائی الیکشن میں تاخیر غیر قانونی ہو گی۔ حکام کا کہنا ہے کہ اب سیکرٹری خزانہ، وزارت کے اعلیٰ سرکاری ملازم اور مرکزی بینک کے گورنر ممکنہ طور پر پاکستان کے وفد کی واشنگٹن میں قیادت کریں گے۔

ش ر ⁄ م م (روئٹرز)