سیلاب زدگان کی مالی مدد سست روی کا شکار

قدرتی آفات کا مقابلہ کرنے کے لئے قائم صوبائی ادارے PDMA کے ڈائریکٹر جنرل خالد شیر دل کے مطابق پنجاب میں سیلاب سے جو آٹھ لاکھ 33 ہزار خاندان متاثر ہوئے تھے، ان میں سے اب تک دو لاکھ خاندانوں کی مالی مدد کی جا چکی ہے۔

پاکستانی وزیر اعظم سید یوسف رضا گیلانی نے سیلاب سے متاثرہ ہر خاندان کو ایک لاکھ روپے دینے کا اعلان کر رکھا ہے۔ پہلے مرحلے میں ہر خاندان کو بیس ہزار روپے دئے جا رہے ہیں۔ یوں پہلے مرحلے میں خاص طور پر جاری کئے گئے وطن کارڈز کے ذریعے 16 ارب روپے تقسیم کئے جائیں گے۔

ان میں سے ابھی تک صرف چار ارب روپے مالیت کے وطن کارڈ جاری کئے جا سکےہیں۔ لیکن ان چار ارب روپوں میں سے بھی ابھی تک متاثرین سیلاب مختلف بینکوں سے صرف پونے دو ارب روپے نکلوا سکے ہیں۔

پنجاب میں ملکی تاریخ کے بد ترین سیلاب سے متاثرہ گیارہ اضلاع میں اس وقت شناختی کارڈ جاری کرنے والے 27 نادرا سینٹر کام کر رہے ہیں۔ ان سینٹرز کے ذریعے روزانہ بنیادوں پر متاثرین کو ساڑھے سولہ ہزار وطن کارڈ جاری کئے جا رہے ہیں۔

ادھر سیلاب زدہ علاقوں سے سرکاری حکام کی طرف سے رشوت لینے، نادرا کی فہرستوں میں متاثرہ خاندانوں کا اندراج نہ ہونے اور وطن کارڈ رکھنے والے دیہی علاقوں کے سادہ لوح باشندوں سے ATM مشینوں سے کیش نکلوا کر دینے کا معاوضہ لینے جیسی شکایات بھی مل رہی ہیں۔

ضلع لیہ کے علاقے شاہ پور روہٹہ کے اشفاق رضا نے ڈوئچے ویلے کو بتایا کہ ان کے گاؤں کے سینکڑوں متاثرہ خاندانوں میں سے اب تک صرف چند ایک کو ہی وطن کارڈ مل سکے ہیں۔

اشفاق رضا کے مطابق ایسے لوگ، جن کی زمینیں دریائے سندھ کے نشیبی علاقوں میں تھیں اور جو سیلابی پانیوں کی نذر ہو گئیں، اِن زمینوں کے وہ مالکان جن کے شناختی کارڈ تھل کے علاقوں والے پتوں پر بنے ہوئے ہیں، انہیں وطن کارڈ جاری نہیں کئے جا رہے۔

اس کے برعکس پنجاب میں پروونشل ڈیزاسٹر مینیجمنٹ اتھارٹی کے سربراہ خالد شیر دل کہتے ہیں کہ سیلاب سے متاثرہ لوگوں کو وطن کارڈ جاری کرنے کے حوالے سے ضلعی رابطہ افسروں کو خصوصی اختیارات دے دئے گئے ہیں۔ ان کے بقول سیلاب سے متاثرہ لوگ اپنی شکایات کے ازالے کے لئے ان ضلعی رابطہ افسروں سے رجوع کر سکتے ہیں۔

لاہور میں پنجاب کی صوبائی حکومت کے بیانات کے مطابق صوبے میں متاثرین سیلاب کے وطن کارڈ بنانے کا عمل رواں مہینے کے آخر تک مکمل کر لیا جائے گا۔

رپورٹ: تنویر شہزاد، لاہور

ادارت: عصمت جبیں