سیکسنی انہالٹ: قدامت پسندوں اور انتہائی دائیں بازو کا مقابلہ

چھبیس مئی کو مرتب کرائے گئے رائے عامہ کے ایک جائزے میں سیاسی پارٹی اے ایف ڈی کو ریاست سیکسنی انہالٹ کی سب سے زیادہ مقبول جماعت قرار دیا گیا ہے۔ اس کی مقبولیت چھبیس فیصد ہے۔ دوسری پوزیشن پر انگیلا میرکل کی سیاسی پارٹی سی ڈی یو ہے اور اس کی عوامی مقبولیت پچیس فیصد ہے۔ بقیہ تمام سیاسی جماعتیں چھ سے تیرہ فیصد کی عوامی تائید رکھتی ہیں۔

جرمنی میں گرین پارٹی کی مقبولیت میں اضافہ، اگلی حکومت بنا سکتی ہے

رائے عامہ کا جائزہ

اس جائزے کے مطابق اے ایف ڈی کو الیکشن جیتنے کے بعد بھی حکومت سازی میں مشکلات کا سامنا ہو گا۔ حکومتی سازی کے معاملات طے کرنے کے دوران انتہائی دائیں بازو  کی اس پارٹی کا مستقبل بھی داؤ پر لگ سکتا ہے۔ ایسی صورت میں سیکسنی انہالٹ کے مقبول لیڈر رائنر ہازلہوف کی پریشانی بڑھ جائے گی۔

سی ڈی یو سے تعلق رکھنے والے ریاستی وزیر اعلیٰ ہازلہوف نے حکومتی اتحاد میں ایس پی ڈی اور گرین پارٹیوں کو بھی شامل کر رکھا ہے۔ سی ڈی یو پچیس فیصد ووٹ لے کر مخلوط حکومت کتنی پارٹیوں کو شامل کر کے قائم کرے گی، یہ ایک بہت مشکل سوال ہے۔

انگیلا میرکل کی سیاسی پارٹی کی مشکلات

چانسلر انگیلا میرکل کی سینٹر رائٹ سیاسی جماعت کرسچن ڈیموکریٹک یونین ( سی ڈی یو) کو ملکی سیاسی منظر پر عدم مقبولیت کا سامنا ہے۔ مبصرین کے مطابق مغربی جرمن علاقوں میں سی ڈی یو کے حامیوں کا رخ اب گرین پارٹی کی جانب ہو رہا ہے۔ کم و بیش ایسی ہی صورت حال سیکسنی انہالٹ میں بھی پیدا ہے۔

دو جرمن ریاستوں میں انتخابات، میرکل کی جماعت مشکل میں

کہا جا رہا ہے کہ ووٹرز ووٹ ڈالتے وقت اے ایف ڈی یا گرین پارٹی کی سوچ کے ساتھ پولنگ بوتھ میں داخل ہوں گے۔ سیاسی ماہرین کا خیال ہے کہ سی ڈی یو کو اپنی انتخابی مہم میں دو رخی مخالفت کا سامنا ہے، ایک مضبوط ووٹ بینک کی حامل سیاسی جماعتوں کا اور دوسرا مخالف سیاسی بیانیے کا۔

مشرقی جرمن علاقوں کا سیاسی منطر نامہ

جرمنی کے مشرقی علاقوں میں سیاسی صورت حال نے عام لوگوں کو حیران کر رکھا ہے۔ انتہائی دائیں بازو کی سیاسی جماعت اے ایف ڈی کو منقسم قیادت کے بحران کا سامنا ہے۔یہ سیاسی جماعت اپنی پالیسیوں کی وجہ سے اب خفیہ اداروں کی نگرانی میں بھی ہے۔ ایسا دیکھا گیا ہے کہ مغربی جرمن علاقوں میں اس کی حمایت سکڑتی جا رہی ہے لیکن مشرقی علاقوں میں یہ ایک قوت بن چکی ہے۔ اس کی حمایت میں بیس فیصد لوگ ہیں۔

جرمن سیاستدانوں کو جان سے مارنے کی دھمکیاں، حکام پریشان

مشرقی جرمن علاقوں میں کسی حد تک پسماندگی اور محرومی کا احساس پایا جاتا ہے۔ اس کی بڑی وجہ انضمام سے قبل آمریت اور اقتصادی محرومی خیال کی جاتی ہے۔ انضمام کے بعد بھی مقامی لوگوں کا خیال ہے کہ معاشی بہتری کی رفتار بہتر ضرور ہوئی لیکن توقع سے کم ہے۔ ایسے افراد کہتے ہیں  کہ اے ایف ڈی ایک ایسی سیاسی جماعت ہے جو برلن میں ان کی آواز بن سکتی ہے۔

گرین پارٹی کی مقبولیت

جرمنی کی ماحول دوست سیاسی جماعت گرین پارٹی کو رواں برس مارچ میں باڈن وورٹمبرگ اور رائن لینڈ پلاٹینیٹ کی اسمبلیوں میں کامیابی حاصل ہوئی تھی۔ ان کو اسی سال ستمبر کے عام پارلیمانی الیکشن سے قبل ایک بڑی پیش رفت قرار دیا گیا تھا۔ مبصرین کے مطابق گرین پارٹی کی کامیابی کا عمل سیکسنی انہالٹ کے ریاستی الیکشن سے کمزور ہو سکتا ہے کیونکہ وہاں انتہائی دائیں بازو کی اہم سیاسی جماعت الٹرنیٹو فار ڈوئچ لینڈ (اے ایف ڈی) کی مقبولیت بڑھی ہے۔

بین نائیٹ (ع ح، ا ا)