شام میں خونریزی جاری، ’اڑتالیس گھنٹوں میں ڈھائی سو ہلاکتیں‘

شامی حکومت کی حامی افوج کی جانب سے اتوار کی رات سے فضائی حملوں کے علاوہ راکٹ فائر اور شیلنگ کا سلسلہ جاری ہے۔  شامی اپوزیشن تنظیم سیریئن آبزرویٹری فار ہیومن رائٹسکے مطابق گزشتہ 48 گھنٹوں سے جاری ان حملوں  میں مشرقی غوطہ پر 2013 میں ہونے والے کیمیائی حملوں کے بعد سے سب سے زیادہ ہلاکتیں ہوئی ہیں۔ آبزرویٹری کے مطابق صرف منگل کو کیے گئے ایک حملے میں بہت سے بچوں سمیت 106 افراد ہلاک ہوئے۔

اقوام متحدہ کے ذرائع کے مطابق ان حملوں کے دوران اس علاقے میں کم از کم پانچ ہسپتالوں پر بھی بمباری کی گئی۔ ان حملوں کے بعد کئی ہسپتال معمول کے مطابق کام کرنے کے قابل نہ رہے۔ مشرقی غوطہ میں محصور قریب چار لاکھ شہریوں کا بیرونی دنیا سے رابطہ تاحال تقریباﹰ مکمل طور پر کٹا ہوا ہے۔

شام ميں باغيوں کے خلاف بمباری، شديد جانی و مالی نقصانات

شام میں ہلاکت خیز کیمیائی حملوں کو سال ہو گیا

ان حملوں کے حوالے سے بدھ کی دوپہر تک شامی حکومتی افواج کی جانب سے کوئی بیان سامنے نہیں آیا تھا لیکن اسد حکومت اکثر یہی کہتی ہے کہ سرکاری افواج کی طرف سے صرف باغیوں اور جنگجوؤں کو نشانہ بنایا جاتا ہے۔

ادھر اقوام متحدہ کی سلامتی کونسل کے مستقل رکن ملک فرانس نے شام میں ان تازہ حملوں کی شدید مذمت کرتے ہوئے انہیں بین الاقوامی قوانین کی سنگین خلاف ورزی قرار دیا ہے۔ شام کے لیے اقوام متحدہ کے رابطہ کار Panos Moumtzis  نے مشرقی غوطہ میں پانچ ہسپتالوں کے نشانہ بنائے جانے کی مذمت کرتے ہوئے ان حملوں کو ’شامی فوج کے جنگی جرائم میں نیا اضافہ‘ قرار دیا ہے۔