طالبان سے مکالمت میں ماہرانہ سفارتکاری ضروری، جرمن وزیر دفاع

ڈی ڈبلیو کے ساتھ گفتگو میں جرمن وزیر دفاع کا کہنا تھا کہ برلن حکومت طالبان کے ساتھ ماہرانہ سفارت کاری سے ساتھ معاملات کو آگے بڑھانے کی خواہش مند ہے۔ انہوں نے یہ وضاحت بھی کی کہ اس بات چیت کا مطلب کابل میں طالبان کی حکومت کو تسلیم کرنا قطعاﹰ نہیں۔

اف‍غانستان کی صورت حال: عالمی و علاقائی قوتوں میں مشاورت شروع

انہوں  نے اس انٹرویو میں واضح کیا کہ اس بات چیت کی ضرورت اس لیے ہے کہ اس جنگ زدہ ملک میں پھنسے ہوئے افراد کا انخلا دوبارہ شروع کیا جا سکے۔

جرمن وزیر دفاع آنے گرَیٹ کرامپ کارین باؤر کا یہ انٹرویو ایک ایسے وقت پر نشر کیا گیا جب ڈی ڈبلیو نے اپنے صحافیوں اور ان کے اہل خانہ کی بحفاظت افغانستان سے نکل کر پاکستان پہنچنے کی تصدیق کی۔

اقوام متحدہ کا انتباہ

جمعرات نو ستمبر کو کابل ایئر پورٹ سے ایک پرواز کے ذریعے 200 غیر ملکیوں کو خلیجی ریاست قطر کے دارالحکومت دوحہ پہنچایا گیا تھا۔ یہ طالبان کے اقتدار میں آنے کے بعد کابل ایئر پورٹ سے سب سے بڑی تعداد میں بیرون ملک روانگی تھی۔ اس پرواز سے یہ امید پیدا ہوئی ہے کہ کابل تک اور وہاں سے باقاعدہ پروازوں کا سلسلہ دوبارہ شروع ہو سکتا ہے۔

’پی آئی اے دوبارہ کابل جانے والی پہلی غیر ملکی ایئر لائن‘

جرمنی سمیت کئی مغربی ممالک نے طالبان کی حکومت کو باضابطہ تسلیم کرنے کو خارج از امکان قرار دیا ہے۔ ان ملکوں نے واضح کیا ہے کہ طالبان حکومت کو اسی وقت تسلیم کیا جائے گا، جب وہ انسانی حقوق کے احترام، خواتین سے بہتر سلوک اور دہشت گردی کے خلاف جنگ کے سلسلے پر کاربند ہوں گے۔

دوسری جانب اقوام متحدہ نے کابل میں طالبان حکومت کو متنبہ کیا ہے کہ اس کے لیے ترقیاتی امداد کا سلسلہ روکا بھی جا سکتا ہے اور یہ افغان معیشت کا دیوالیہ نکل جانے کے مترادف ہو گا۔

افغانستان پر نگاہ

نائن الیون دہشت گردانہ حملوں کی بیسویں برسی کے موقع پر منعقدہ ایک تقریب سے خطاب کرتے ہوئے جرمن وزیر دفاع آنے گرَیٹ کرامپ کارین باؤر نے کہا کہ اسلام کے نام پر جہادی عمل انسانیت کے نام پر ایک دھبہ ہے۔ انہوں نے واضح کیا کہ کابل میں طالبان کی حکومت کی نگرانی ضروری ہے تا کہ دیکھا جا سکے کہ افغان سرزمین سے بین الاقوامی دہشت گردی کی ازسرِنو افزائش تو شروع نہیں ہو گئی۔

انسداد دہشت گردی کے امور کے ماہر پیٹر نوئے مان کا کہنا ہے کہ طالبان کی نئی عبوری حکومت کی تشکیل پر عالمی خدشات میں اضافہ ہوا ہے کیونکہ اس میں کئی نام ایسے ہیں جو امریکا کو دہشت گردی کی وجہ سے مطلوب ہیں۔

مظاہرین کو منتشر کرنے کے لیے افغان طالبان کی ہوائی فائرنگ

انہوں نے یہ بھی کہا کہ اس عبوری حکومت میں شامل زیادہ افراد کا تعلق افغانستان کی پشتون آبادی سے ہے۔ نوئے مان کے مطابق اس حکومت میں حقانی نیٹ ورک بھی شامل ہے، جو القاعدہ سے بھی وابستہ رہا ہے اور افغانستان کے نئے وزیر داخلہ کا تعلق بھی اسی حقانی نیٹ ورک سے ہے۔

پیٹر نوئے مان جرمنی کی قدامت پسند سیاسی جماعت کرسچن ڈیموکریٹک یونین (سی ڈی یو) کی طرف سے اگلے عام الیکشن کے نتیجے میں چانسلر کے عہدے کے لیے امیدوار آرمین لاشیٹ کے مشیر بھی ہیں۔

نِک مارٹن (ع ح / م م)