فرانس میں ہوائی جہازوں کی نمائش

لابورجے میں جاری ہوائی جہازوں کی اس نمائش میں فضائی سفر کی سہولت فراہم کرنے والی بڑی بڑی کمپنیاں حصہ لے رہی ہیں۔ اس نمائش میں ایک جانب روسی ساختہ سخوئی سپر جیٹ 100 رکھا گیا ہے تو دوسری طرف بوئنگ 787 ڈریم لائنر بھی موجود ہے جس کی پہلی باقاعدہ پرواز آنے والے ہفتوں میں متوقع ہے۔

ہر دوسرے سال منعقد ہونے والی اس نمائش میں روایتی بوئنگ اور ایئر بس کمپنی کے جہازوں کی خریداری سب سے زیادہ ہوتی ہے، مگر اس سال طیاروں کی خریداری کافی کم ہونے کا امکان ہے۔ ماہرین کی مطابق خریداری کے رجحان میں کمی کی اصل وجہ عالمی معاشی بحران کے نتیجے میں فضائی سفرکی انڈسٹری پر پڑنے والے اثرات ہیں۔ حالیہ دنوں میں دنیا بھر کی فضائی کمپنیوں کی نمائندہ تنظیم انٹرنیشنل ایئر ٹرانسپورٹ ایسوسی ایشن نے بتایا تھا کہ بین الااقوامی ایئرلائنز کو سال روان کے دوران نوبلین ڈالر کا خسارہ ہو سکتا ہے۔

فضائی اور خلائی سفر کے سرکردہ یورپی ادارے EADS کے سربراہ لوئی گالوآ نے کہا: ’’2010 اور 2011 بڑے نازک سال ہوں گے۔ ان دونوں برسوں کے دوران ہی ہم یہ اندازہ لگا سکیں گے کہ ہمارے شعبے کا بحران کتنا سنگین ہے۔‘‘

ماہرین کے اندازوں کے مطابق اس نمائش میں ہوائی جہازوں کی خرید و فروخت کم ہوسکتی ہے جس کا باعث مختلف وجوہات کی بنا پر بین الاا قوامی سفر میں متوقع کمی ہے۔ بتایا جاتا ہے کہ مسافروں کی تعداد میں کمی کی وجہ عالمی ادارہ صحت کی جانب سے سوائن فلو کو عالمی معتدی بیماری قرار دیا جانا ہے۔

ابھی کچھ دنوں قبل ہی ایئر فرانس کے طیارے کے حادثے میں 228 مسافر جان بحق ہوئے تھے۔ اس حادثے کی وجہ سے بھی فضائی سفر کی صنعت کو شدید نقصان پہنچا ہے۔ ابھی اس بارے میں کچھ نہیں کہا جاسکتا کہ فرانسیسی طیارے کا حادثہ اس نمائش میں رکھے اسی جہاز کے ماڈل پر کیا اثرات مرتب کرے گا، لوئی گالوآ کہتے ہیں: ’’ہمارے لیئے یہ ایک المیہ ہے۔ ہم اتنی جلدی اور آسانی سے اس حادثے کے اسباب کا پتہ نہیں چلا سکیں گے۔ امید ہے کہ بالآخر ہم ان اسباب کو جان سکیں گے۔ ہر شخص کو پتہ چلنا چاہیئے کہ ہوا کیا ہے۔‘‘

اس نمائش میں دنیا بھر سے فضائی سفر کے شعبے کے صنعت کار نئے جہازوں کے ماڈلز کا جائزہ لیں گے اور یوں مستقبل میں ان کی خریداری کے بارے میں فیصلہ کر سکیں گے۔ اسی لئے ماہرین اس نمائش کو عالمی مالیاتی بحران کے دوران فضائی صنعت کے لئے ایک مثبت قدم کے طور پر دیکھ رہے ہیں۔

رپورٹ : انعام حسن

ادارت : افسر اعوان