قذافی کے بعد لیبیا کیسا ہو گا، باغیوں کا منصوبہ

خبر رساں ادارے اے ایف پی نے برطانوی روزنامہ ’لندن ٹائمز‘ میں پیر کو شائع ہونے والی ایک رپورٹ کے حوالے سے بتایا ہے کہ لیبیا کے باغیوں کی قومی عبوری کونسل ( این ٹی سی) کے اس منصوبے کی دستاویز ستّر صفحات پر مشتمل ہے۔ اسے طے کرنے میں انہیں مغربی طاقتوں کی مدد حاصل رہی ہے۔

اس منصوبے کی دستاویز لندن ٹائمز کو دستیاب ہوئی ہے۔ اس میں باغیوں نے تسلیم کیا ہے کہ ان کی جانب سے قذافی کو اقتدار سے بے دخل کر پانے کا امکان بہت کم ہے تاہم اندرونی نااتفاقیاں قذافی کو حکومت چھوڑنے پر مجبور کر دیں گی۔

ایسے وقت کے لیے باغیوں نے دس ہزار سے پندرہ ہزار تک نفری کی ’طرابلس ٹاسک فورس‘ تشکیل دینے کا ارادہ ظاہر کیا ہے، جو دارالحکومت کا کنٹرول سنبھالے گی اور قذافی کے معروف حامیوں کو حراست میں بھی لے گی۔

اس منصوبے کے مطابق تقریباﹰ پانچ ہزار پولیس اہلکار عبوری حکومت کی سکیورٹی فورسز کے لیے بھرتی کیے جائیں گے۔ باغیوں کا دعویٰ ہے کہ قذافی حکومت کے آٹھ سو موجودہ اہلکار پہلے ہی ان کے ساتھ شامل ہیں۔

اس دستاویز میں قذافی کا اقتدار ختم ہونے کے فوری بعد کے حالات میں ٹیلی مواصلات، بجلی اور ٹرانسپورٹ کے نظام کو قابو میں رکھنے کا لائحہ عمل بھی بیان کیا گیا ہے۔

باغیوں نے یہ اندازہ بھی ظاہر کیا ہے کہ قذافی حکومت میں شامل ستّر فیصد اعلیٰ اہلکار نئی حکومت میں شامل ہونا چاہیں گے۔

این ٹی سی نے لندن ٹائمز میں شائع ہونے والی رپورٹ کی تصدیق ہے۔ تاہم انہوں نے اس اخبار سے بعض اہم معلومات شائع نہ کرنے کی بھی درخواست کی، جن کے سامنے آنے پر لیبیا میں جاری آپریشن پر منفی اثرات پڑ سکتے ہیں۔

باغیوں نے یہ منصوبہ اس امید میں ترتیب دیا ہے کہ لیبیا کو عراق جیسے حالات کا سامنا نہ کرنا پڑے۔

رپورٹ: ندیم گِل / خبر رساں ادارے

ادارت: عابد حسین