ماحولیاتی تبدیلیاں، پاکستانی انتخابات میں کہیں پیچھے

ماحولیاتی کارکن احمد شبر کا تعلق کراچی سے ہے اور وہ آٹھ فروری کو ہونے والے پارلیمانی انتخاباتمیں بطور امیدوار حصہ لے رہے ہیں۔ ان کی انتخابی مہم کا مرکز موسمیاتی حوالے سے بڑھتے خطرات کے بارے میں آگاہی پھیلانا ہے جنہیں عام طور پر پاکستان میں نظر انداز ہی کیا جاتا ہے۔ اور اپنی مہم کے دوران وہ اپنے ووٹرز کو ان خطرات کے بارے میں بتاتے رہے۔

پاکستان میں دو سال قبل یعنی 2022 میں مون سون بارشوں کے نتیجے میں آنے والے سیلاب نے بڑی تباہی مچائی تھی اور ملک کا ایک تہائی حصہ ڈوب گیا تھا۔ اس وقت کی حکومت نے موسمیاتی تبدیلیوں کے سبب پیدا ہونے والی اس صورت حال سے بین الاقوامی دنیا کو آگاہ کیا تھا۔

لیکن ملک میں بڑھتی ہوئی مہنگائی اور اپوزیشن کے خلاف بڑے پیمانے پر سیاسی کریک ڈاؤن اور جمعرات آٹھ فروری کو ہونے والے انتخابات نے موسمیاتی تبدیلیوں سے متعلق معاملات کو کہیں پس پشت ڈال دیا ہے۔

انجینئرنگ کی ڈگری رکھنے والے احمد شبر آزاد امیدوار کے طور پر ان انتخابات میں حصہ لے رہے ہیں۔ ان کی جیت کے امکانات تو شاید کم ہی ہیں لیکن وہ اس موقع کو آگاہی پھیلانے کا ایک موقع گردانتے ہیں: ''میرے لیے انتخاب لڑنے کی ایک اہم وجہ لوگوں کو یہ باور کرانا ہے کہ پاکستان میں موسمیاتی تبدیلی کسی بھی سیاسی جماعت کے لیے ترجیح نہیں رہی۔‘‘

سیلاب کے بعد ماحولیاتی تبدیلیوں سے جڑے نقصانات پربحث پاکستان میں مرکزی دھارے کا اہم موضوع بن گئی تھی، لیکن  بحالی کی کوششوں کے لیے عطیہ دہندگان کی طرف سے اربوں ڈالرز کے وعدوں کے باوجود حکومت، ان لوگوں کے ساتھ روابط میں ناکام رہی جو شدید موسمیاتی آفات کے خطرات سے دو چار ہیں۔

احمد شبر مانتے ہیں کہ بین الاقوامی دنیا سے فنڈز کی موصولی سے قبل ملکی سیاستدان موسمیاتی تبدیلی کے موضوع پر کوئی خاص دلچسپی نہیں رکھتے تھے۔ اب ان کا کہنا ہے ''ماضی کی حکومتیں قدرتی آفات خدا کی رضا سمجھتے تھے تاہم اب اچانک ان کا ماننا ہے کہ وہ سب موسمیاتی تبدیلیوں کی وجہ سے ہیں۔‘‘

ووٹروں کا ایک چھوٹا سا ہجوم شبر کو سننے کے لیے جمع تھا جس میں وہ 20 ملین سے زائد آبادی والے شہر کراچی میں پانی کی قلت اور ہوا میں خطرناک سطح تک زہریلی گیسوں کی موجودگی کے حوالے سے آگاہی دے رہے تھے۔

ان کو سننے والوں میں 60 سالہ آمنہ جمیل بھی شامل تھیں۔ ان کا کہنا تھا کہ دنیا بھر میں موسمیاتی تبدیلی اب واضح ہو چکی ہے: ''میں جانتی ہوں کہ غیر موسمی بارشوں کا کیا اثر ہو سکتا ہے اور وہ فصلوں کو کیسے متاثر کر سکتی ہیں۔ موسمیاتی تبدیلیوں سے زراعت کا پیشہ بھری طرح متاثر ہوا ہے۔‘‘

مرکزی دھارے کی سیاسی جماعت اور موسمیاتی تبدیلی

سائنس دانوں کا کہنا ہے کہ پاکستان میں آنے والے سیلاب بڑی حد تک موسمیاتی تبدیلی سے منسلک ہیں۔ پاکستان میں 2022 میں آنے والے سیلاب سے سب سے زیادہ متاثر صوبہ سندھ ہوا، جہاں صوبائی حکومت پاکستان پیپلز پارٹی (پی پی پی) کے پاس تھی۔

پی پی پیکی سینیٹر اور سابق وزیر ماحولیات شیری رحمان کا اصرار ہے کہ ان کی پارٹی نے ''پائیدار ترقی اور موسمیاتی مسائل سے جڑے معاملات کو پارٹی کے اقتصادی ایجنڈے میں اہم مقام دیا ہے۔‘‘ ان کا ماننا ہے کہ دیگر سیاسی جماعتیں اس معاملے پر محض زبانی جمع خرچ ہی کرتی ہیں۔

ان کا کہنا ہے کہ ان کی سیاسی جماعت نے موسمیاتی تبدیلی کے خطرے سے دوچار علاقوں میں ایسے مکانات کی تعمیر کا پروگرام شروع کیا ہے جو قدرتی آفات کی صورت میں نسبتاﹰ محفوظ ہیں۔ اور یہ کہ ان کی حکومت ایسے خطرات کے بارے میں بروقت آگاہی دینے کے لیے بنیادی ڈھانچے کو متعارف کرانے کے ساتھ ساتھ قابل تجدید توانائی پرمنتقلی کو ترجیح دے گی۔

م ق/ا ب ا (اے ایف پی)