معیشت دوبارہ چلانے کے لیے جرمن چانسلر پُرعزم

ان اقدامات کے تحت ویلیو ایڈڈ ٹیکس یا ویٹ (VAT) میں کچھ عرصے کے لیے کمی کر کے اس انیس سے سولہ فیصد پر لایا جائے گا۔ حکومت کی طرف سے  بچوں کی کفالت کے لیے فیملیز کو فی بچہ اضافی تین سو یورو دیے جائیں گے۔ اس کے علاوہ الیکٹرک کار خریدنے پر حکومتی رعایت کو دوگنا کرنے کا فیصلہ بھی کیا گیا ہے۔

دارالحکومت برلن میں اقتصادی پیکج سے متعلق پریس کانفرنس میں چانسلر میرکل نے کہا کہ نئے اقدامات کا مقصد مالی دباؤ میں کمی لانا، روزگار کو تحفظ فراہم کرنا اور معیشت کو بھرپور انداز میں متحرک کرنا ہے۔

انہوں نے کہا کہ اس مالی منصوبے سے کساد بازاری کی شکار معیشت کو ایک نئی زندگی ملے گی اور حکومت میں شامل تمام اتحادیوں نے اقتصادی پیکج  میں شامل اقدامات کی حمایت کی ہے۔

برلن حکومت نے ماحولیاتی تبدیلیوں کی روک تھام کے حوالے سے پچاس بلین یورو کا ایک فنڈ بھی قائم کیا ہے۔ اس فنڈ کے ذریعے جرمنی کو ڈجیٹل میدان میں ترقی دینا بھی شامل ہے۔

یہ بھی پڑھیے:جرمنی: یورپ کی سب سے بڑی معیشت کو کساد بازاری کا خطرہ

جرمنی یورپ کی سب سے بڑی معیشت ہے۔ اس سال کی پہلی سہ ماہی میں جرمن معیشت کسادبازاری کا شکار ہوگئی جبکہ دوسری سہ ماہی میں بھی گراوٹ متوقع ہے۔ پچھلے ایک ماہ کے دوران بیروزگاری میں اضافہ ہوا ہے۔ شرح بیروزگاری گزشتہ ماہ 5.8فیصد تھی اور اب یہ 6.3 فیصد پر پہنچ گئی ہے۔ خیال ہے کہ اگر حکومت روزگار بچانے کے لیے بروقت اقدامات نہ کرتی تو کہیں زیادہ لوگ بے روزگار ہو جاتے۔

جرمنی نے کورونا لاک ڈاؤن کے کوئی ایک ماہ بعد بیس اپریل سے بتدریج نرمی لانا شروع کر دی تھی۔جرمنی کی مخلوط حکومت میں چانسلر میرکل کی پارٹی کرسچین ڈیموکریٹک یونین(سی ڈی یو)، ریاست باویریا کی حکمران جماعت کرسچین سوشل یونین (سی ایس یو) اور سوشل ڈیموکریٹک پارٹی (ایس پی ڈی) شامل ہیں۔

ع ح، ش ج (نیوز ایجنسیاں)