الزامات سنجیدگی سے جائزہ لیں گے، ملکہ الزبتھ

برطانوی شاہی خاندان نے طویل مشاورت کے بعد منگل کو رات گئے ملکہ برطانیہ کی طرف سے ایک مختصر بیان جاری کیا۔ اس بیان میں انہوں نے نوجوان شاہی جوڑے کی شکایات پر اظہار ہمدردی کیا اور کہا کہ ''پورے خاندان کو یہ جان کر دکھ ہوا ہے کہ پچھلے چند برسوں میں ہیری اور میگھن کو کن مشکلات کا سامنا رہا۔‘‘

ملکہ الزبتھ نے  مزید کہا، ''جو معاملات اٹھائے گئے ہیں، خاص کرکے نسل کے حوالے سے، وہ پریشان کُن ہیں۔‘‘

تاہم اپنے بیان میں انہوں نے یہ بھی تاثر دیا کہ برطانوی شاہی خاندان  تمام الزامات سے متفق نہیں۔ ان کے مطابق اصل میں ہوا کیا تھا، اس بارے میں لوگوں کی ''یاداشت الگ الگ ہو سکتی ہے‘‘۔ تاہم انہوں نے یقین دلایا کہ ان الزامات کو ''سنجیدگی سے لیا جا رہا ہے اور انہیں خاندان میں اندرونی طور حل کیا جائے گا۔‘‘

برطانوی شاہی خاندان پر دو روز سے دباؤ تھا کہ وہ میگھن اور پرنس ہیری کے سنگین الزامات کا جواب دیں۔

مبصرین کے مطابق شاہی محل کی طرف سے جاری کیے جانے والے مختصر بیان سے واضح ہے کہ برطانوی خاندان مزید اس معاملے پر بات نہیں کرے گا اور اب جو بھی ہوگا وہ پسِ پردہ اور نجی طور پر ہوگا۔

امریکا کی مشہور میزبان اوپرا وِنفری کو دیے گئے غیرمعمولی انٹرویو میں میگھن اور پرنس ہیری نے پہلی بار تفصیل سے بتایا کہ برطانوی شاہی خاندان کے اندر ان کے ساتھ کتنا خراب سلوک ہوا۔ اس حوالے سے انہوں نے نسلی تعصب، اپنی ذہنی صحت اور میڈیا کے کردار پر کھل کر بات کی۔

اس انٹرویو نے دنیا میں برطانوی شاہی خاندان کی ساکھ کو بظاہر گہرا نقصان پہنچایا ہے۔

میگھن اور ہیری پر کیا گزری؟

انٹرویو میں میگھن نے انکشاف کیا کہ شاہی خاندان کا حصہ ہونے کے دوران انہیں اس وقت نہایت دکھ پہنچا جب ان کے بیٹے آرچی کی پیدائش سے پہلے شاہی خاندان کے ایک رکن نے پرنس ہیری سے جاننا چاہا کہ کیا وہ جانتے ہیں کہ ان کے بچے کی ر نگت ''کتنی سانولی‘‘ ہوگی۔

میزبان اوپرا ونفری کے مطابق پرنس ہیری نے انہیں یہ نہیں بتایا کہ یہ بات خاندان کے کس رکن نے کہی تھی، تاہم بعد میں انہوں نے واضح کیا کہ اس بات کا ان کی دادی ملکہ برطانیہ یا دادا پرنس فلپ سے کوئی تعلق نہیں۔

میگھن نے مزید بتایا جس وقت وہ حاملہ تھیں ان پر واضح کردیا گیا تھا کہ شاہی خاندان کی طرف سے ان کے بچے کو شہزادے کا درجہ نہیں ملے گا اور نہ ہی کوئی شاہی لقب یا سکیورٹی پروٹول مہیا کیا جائے گا۔

میگھن کے مطابق شاہی خاندان کے اندر ان کی زندگی اتنی اجیرن ہوگئی تھی کہ انہیں اپنی جان لینے کے خیالات آتے تھے۔ جب انہوں نے اس حوالے سے مدد مانگی تو ان کے مطابق شاہی خاندان سے انہیں کوئی رہنمائی نہ ملی۔

پرنس ہیری کے مطابق اس دوران جب برطانوی میڈیا میں ان کی اہلیہ کے رنگ و نسل کے حوالے سے مسلسل حملے کیے جارہے تھے، برطانوی شاہی خاندان میں سے کسی نے بھی ان کی دل جوئی نہیں کی اور کوئی ان کے حق میں نہیں بولا، جس کا انہیں ''دکھ‘‘ ہے۔

انہوں نے کہا کہ ایک مرحلے پر ان کے والد پرنس چارلس نے بھی ان سے فون پر بات کرنا چھوڑ دی تھی۔

ش ج / ا ب ا (اے ایف پی، اے پی)